Studentane på fagskulen i eldreomsorg har lokale i den tidlegare kokk- og stuertskulen i Bergen som i dag tilhøyrer Bergen tekniske fagskole. (alle foto: Bjarte Brask Eriksen)
– Eg har lyst til å vidareutdanne meg og treng fagleg påfyll. Det er kjekt å byrje på skulen igjen etter mange år i jobb, seier Mette Halland som er hjelpepleiar ved sjukeheimen Fantoft omsorgssenter.
Stor innsats av Bergen kommune
Hanna F. Gjesdal ved Opplæringsavdelinga i Hordaland fylkeskommune fortel at initiativet kjem frå Bergen kommune som har store utdanningsprogram både ufaglærte og fagarbeidarar i pleie- og omsorgssektoren.
– Bergen kommune gjer ein stor innsats for vidareutdanning og fagleg påfyll for fagpersonell innan helsesektoren. I denne omgangen set vi i gang utdanning for 24 fagutdanna i psykisk helsearbeid og 15 fagutdanna innan eldreomsorg.
Studentane på fagskulen i psykisk helsearbeid i klasserommet på Bergen tekniske fagskole. Alle har fri med full lønn under studiet på 50 prosent deltid over to år og får 20.000 kroner i lønsauke.
Godkjent fagskuleutdanning
Gjesdal seier at bakgrunnen er at Fitjar vidaregåande skule i fjor fekk godkjent fagskuleutdanning i eldreomsorg og Fusa vidaregåande skule fekk godkjent fagskuleutdanning i psykisk helsearbeid.
– Bergen kommune merka seg at desse skulane sette i gang denne utdanninga i fjor og ønskte å få tilsvarande fagskule i Bergen. For å få dette til, har vi innleia samarbeid med Bergen tekniske fagskole, som stiller lokale til disposisjon, seier Gjesdal.
Alle har snudd seg rundt
Harald Pedersen i Bergen kommune er glad for dette samarbeidet med fylkeskommunen og dei tre skulane.
– Fitjar og Fusa er langt unna. Alle har snudd seg rundt for å få dette til her i Bergen. No får fagarbeidarar i helse- og sosialfag vidareutdanning. I tillegg får dei ein lønsauke på 20.000 kroner. Vi ønskjer at desse skal få ein eigen tittel, kan hende fagskulekandidat. Vi vil ha innspel om dette. Bergen kommune er og i dialog med fylkeskommunen om å få inn andre tema som kreftomsorg og rehabilitering. Alle får gratis utdanning og fri frå jobben med full lønn får å gå på skulen, seier Pedersen.
Rektor Anna Bodil Tislevoll (f.v.) ved Fitjar vidaregåande skule har oppretta byfilial i Bergen. Hanna Gjesdal har lagt til rettes for utdanninga i Hordaland fylkeskommune og Kjellaug Øvrebø Johansen er fagansvarleg for utdanninga.
Stiller lokale til disposisjon
Rektor Torbjørn Tvedt ved Bergen tekniske fagskole er glad for at skulen kan medverke til denne utdanninga og ønskjer dei to klassane velkommen ved skulen.
Mens Bergen tekniske fagskole stiller lokale til disposisjon, har Fusa og Fitjar vidaregåande skule det faglege ansvaret.
Historisk merkedag
– Dette er ein historiske merkedag for vår skule, seier Anna Bodil Tislevoll, rektor ved Fitjar vidaregåande skule. – Eg er ærbødig for at vi kan starte opp i Bergen. Eg er takksam for å bli spurt av Bergen kommune som ønskjer dette for sine tilsette. Vi starta 6. oktober i fjor i Fitjar. Eg har god tru på at vi skal klare dette. Andre kommunar har mykje å lære av Bergen, seier Tislevoll.
Nokre av dei som har jobba for å få fagskuleutdanning i helsefag i Bergen: Bjarte Johnsen (faglærar Fusa vidaregåande skule), rektor Annbjørg Laupsa (Fusa vidaregåande skule), Harald Pedersen (Bergen kommune), Hanna Gjesdal (Hordaland fylkeskommune, framfor), Marianne Moberg (fagansvarleg Fusa vidaregåande skule), Oddrun Jørgensen (faglærar Fusa vidaregåande skule og Torbjørn Tvedt (rektor Bergen tekniske fagskole). Faglærar Maren Assev, Fusa vidaregåande skule var ikkje til stades.
Tillit og ansvar
Annbjørg Laupsa, rektor ved Fusa vidaregåande skule understrekar at Bergen kommune har gjort det mogeleg å starte utdanninga i Bergen.
– Vi er svær glade for at kommunen gir oss både tillit og ansvar for opplæringa. 3. november i fjor sidan starta Hordaland fylkeskommune og Fusa vidaregåande skule fagskuleutdanning i psykisk helsearbeid. Det var ein stor dag. Fagskuleutdanninga innan helsefaga er ei yrkesretta og målretta utdanning, og er komen for å bli. Bergen kommune har sett kor viktig denne utdanninga er, og med satsinga på vidareutdanning viser dei tydeleg at dei ser arbeidstakarane sine og ønskjer å gje dei fagleg påfyll, seier Laupsa.
Fri med full løn
Studiet er på 50 prosent over to år og er ein kombinasjon av undervising på Bergen tekniske fagskole og nettundervising. Tilbodet er gratis for studentane. I tillegg gjev Bergen kommune dei fri til studiet med full løn.
Statlege midlar
Til å utvikle og setje i gang utdanninga i fjor har fylkeskommunen fått statlege midlar gjennom fylkesmannen i Hordaland, totalt 1,345 millionar kroner. Hordaland fylkeskommune løyvde 400.000 til dette. I år får fylkeskommunen 600.000 kroner i statleg tilskot til undervisinga av dei tilsette i Bergen kommune.