Øvretveit får prisen for arbeidet sitt som redaktør av Radio Sotra og for innsatsen sin med mange tiltak innan kulturfeltet. Prisen er på kr 50 000.
Leiar i kultur- og ressursutvalet Helge Andre Njåstad overrekte kulturarbeidarprisen til Rolf Øvretveit frå Sund.(Foto: Tone Stedal Haugland, Hordaland fylkeskommune.)
Motivera
– Heile ditt vaksne liv har du skapt gode kulturtilbod til både born og vaksne i kommunane Sund, Fjell og Øygarden. Vi håpar at denne prisen kan motivera til vidare innsats i mange år framover. Gratulerer! sa Njåstad ved tildelinga.
Radio Sotra
Radio Sotra som Øvretveit er redaktør for, og har vore med på å driva sidan starten midt på 1980-talet, spelar ei stor rolle for folk i kystregionen, også for kultur- og samfunnsliv. Alt frå barnehagar, utallege skuleklassar, ulike lag og organisasjonar, seniorradio osv. har fått sendetid. Radio Sotra har også bidrege til auka bevisstheit om lokalpolitikken ved direktesendingar frå utallege kommunestyremøte, sa utvalsleiar Njåstad ved tildelinga.
Kino og festival
Øvretveit har drive Sotra kino i mange år. Han har drive ungdomsklubbar både i Sund og Fjell og takka vera hans innsats har innbyggjarane i desse kommunane kunna gle seg over mange ulike kulturtilbod. I 2005 vart Vestkystfestivalen stifta, og Øvretveit har vore dagleg leiar og «primus motor» heile tida. Denne festivalen, som er eit samarbeidsprosjekt mellom Fjell, Sund og Øygarden kommunar har vore med på å gje eit felles løft i kulturtilbodet i heile regionen.
Rolf Øvretveit står stadig i spissen for store kulturarrangement i regionen. Dei seinare åra har han stått som arrangør av store tilskipingar på Straume, der alle aldersgrupper har fått sine tilbod. No i juni var ca. 9000 personar innom arrangementa.
Spreier glede
I grunngjevinga frå forslagsstillaren heiter det at Øvretveit har ei ekte glede av å skapa desse tilboda til over 30 000 innbyggjarar i Hordaland – og han gjer det utan tanke på eiga vinning. Han er ein mann som gjennom si gjerning lever etter mottoet «den største gleda ein kan ha, det er å gjera andre glad».
Oppmuntring
Med utdelinga av kulturarbeidarprisen ønskjer Hordaland fylkeskommune å setja særleg fokus på dei mange eldsjelene som held kulturlivet i gang. Prisen vert gjeven til personar, lag eller organisasjonar som har utmerkt seg gjennom eit eineståande kulturarbeid med stor tyding for kulturlivet i Hordaland. Prisen er meint som ei oppmuntring til kulturarbeidarar rundt om i fylket som legg ned utallege timar og krefter i arbeidet sitt for kulturlivet. I 2009 er det femte gongen prisen vert utdelt.