Statssekretær Hallvard Ingebrigtsen var lydhøyr overfor bodskapen Hordaland hadde med seg.
Bybane
Delegasjonen presenterte «Kunstnarisk utsmykking av bybaneprosjektet» for statssekretæren. Hordaland fylkeskommune har som ambisjon, når fylkeskommunen overtar utbygginga, å inkludera utsmykking i byggjeprosjektet. Kultur- og ressursutvalet har mellom anna vore på studietur til Nice for å sjå nærmare på utsmykkingsprosjektet der og vil vurdera det som mal for vidare arbeid.
– Statssekretæren var svært positiv til dette initiativet og lova å støtta opp under fylkeskommunen sitt arbeid, seier ein nøgd utvalsleiar Helge Andre Njåstad.
Hordaland teater
Fylkesordføraren viste tal for besøk og statlege kroner til teatersektoren. Ho argumenterte for at Hordaland teater burde få større vekst i tilskotet frå staten for å styrkja dette viktige teateret ytterlegare. Hordaland fylkeskommune ynskjer å satsa på teateret og denne meldinga tok departementet i mot og vil vurdera større tilskot i statsbudsjettet for 2010.
Kulturelt utviklingsprogram
Delegasjonen presenterte også Kulturelt utviklingsprogram (KUP) for statssekretæren. Dette programmet vil fylkeskommunen arbeida vidare med fram mot fylkestinget i juni.
Dialog ved tilskotsdeling
Fylkeskommunen sine representantar var og innom at dialog mellom stat og fylkeskommune er viktig når nye tiltak – der det er føresett deling mellom regionalt/lokalt nivå og stat – skal inn på statsbudsjettet.
Os kunst- og kultursenter
Spørsmål om Os kunst- og kultursenter og prioriteringa av dette innanfor statlege midlar i 2009, vart teke også teke opp. Hordaland fylkeskommune har prioritert dette på topp og denne prioriteringa er og gjeldande for 2009.
Statssekretæren gav gode signal og positiv tilbakemelding som gjev oss grunnlag for stor optimisme for statlege midlar til Os kunst- og kultursenter i 2009, seier leiaren i kultur- og ressursutvalet, Helge Andre Njåstad.
Nyttig møte
Det var eit nyttig møte der Hordaland fylkeskommune si leiing innanfor kulturfeltet fekk presentert viktige prosjekt og etablert god dialog med politisk leiing i departementet.
– Eg er godt nøgd med møtet, seier fylkesordførar Torill Selsvold Nyborg. – Me fekk vist departementet at Hordaland er eit fylke som verkeleg satsar på kultur.
Kontaktpersonar
Fylkesordførar Torill Selsvold Nyborg – mob. 915 22 733
Leiar kultur- og ressursutvalet Helge Andre Njåstad – mob. 957 97 021