Hordaland fylkeskommune har i dag tildelt Tide Buss AS kontrakt for køyring av buss i Fana, Ytrebygda og Os for perioden 1. mai 2010 - 30. april 2017. Kontrakten omfattar også matebussystemet til Bybanen.
Bergen Sør og Os er det sjuande området der busstilbodet vert konkurranseutsett i Hordaland. Tide Buss AS er kåra som vinnar av anbodskonkurransen ut i frå ei vurdering av tildelingskriteria pris, kvalitet og miljø. Tide Buss AS var den av tilbydarane med lågast pris – om lag 149,5 mill. kr pr. år. Tide Buss AS vann i konkurranse med Fjord 1 Partner AS, Nettbuss Drammen AS og Norgesbuss AS.
Tide Buss AS skal køyra bussane i Bergen sør og Os også frå 1. mai 2010 då anbodsperioden tek til. Men bussane vil då ha profilen til Skyss, fylkeskommunen sin driftsorganisasjon for kollektivtrafikken i Hordaland.
100 nye miljøvenlege bussar
Kontrakten med Skyss har eit omfang på om lag 189 000 rutetimar pr. år og omfattar all rutetransport inkludert skuleskyss. Kontrakten omfattar om lag 100 nye bussar, som er universelt utforma (mellom anna lågt innsteg/golv som gjer det lettare og raskare å gå av og på bussen). Bussane har miljøvenlege dieselmotorar, og vil køyre med ei innblanding av 5 % biodiesel.
Kontraktsperioden er 1. mai 2010 til 30. april 2017.
Kontaktpersonar:
Torill Selsvold Nyborg, fylkesordførar - telefon 55 23 90 11 / 915 22 733
Oddmund Sylta, direktør i Skyss - telefon 932 30 401 / 55 23 93 94