Fylkestinget i Hordaland meiner at den trafikale situasjonen på E39 mellom Stavanger og Bergen tilseier at det snarleg bør koma ei sjette ferje som skal nyttast på strekningane Halhjem/Sandvikvåg og Arsvågen/Mortavika, heiter det i fylkestinget si fråsegn
Fylkestinget legg til grunn 50% statleg finansiering i utbetringsarbeidet på E39 Jektevik –Sandvikvåg. Fylkestinget ber om at staten i handlingsprogrammet aukar løyvingane til prosjektet i samsvar med denne delinga, sum 90 mill. kr.
I handlingsprogrammet er det sett av 30 mill. kr frå staten til denne strekninga i 2010-13.
Fylkestinget legg til grunn at Statens vegvesen i nært samarbeid med fylkeskommunen tek hovudansvaret for å initiera og koordinera planlegging, bygging og drift mv. av innfartsparkering, knutepunkt og stoppestadar på riksvegar. Fylkestinget ber om at anlegg for innfartsparkering og kollektivfelt på RV 555 i Fjell og i Bergen kommune samt at anlegg for innfartsparkering langs E 39 i kommunane Lindås, Meland, Bergen og Os vert teke inn i handlingsprogrammet og sikra
statleg finansiering.
Hordaland fylkeskommune arbeider no med eit finansieringsopplegg for oppgradering og utvikling av busstasjonen i Bergen. Som for bussterminalen i Oslo finn fylkestinget det rimeleg at det også vert lagt opp til statleg medfinansiering av dette viktigaste kollektivknutepunktet på Vestlandet.