Vedtaket er gjort med 39 (Ap, Frp, H) røyster mot 18 (KrF, Sp, V, SV, Raudt) røyster.
Jondal-ordførar Sigrid Brattabø Handegard takka Fylkestinget etter saka om Jondalstunnelen.
Forslag som fall
Senterpartiet og Venstre føreslo:
«Fylkestinget viser til vedteken finansieringsplan for Jondalstunnelen på møte 24. april 2008. Fylkestinget godkjenner utbygging av alternativ 4, S1+S6+N6. Fylkestinget ber fylkesrådmannen arbeida vidare med finansieringa (auken) og legg til rette for at staten og kommunane bidreg.»
Forslaget frå Senterpartiet og Venstre fekk 13 røyster (Sp, V, SV og Raudt) og fall.
Kristeleg folkeparti sette fram slikt forslag:
”Fylkestinget viser til vedteken finansieringsplan for Jondalstunnelen på møte 24. april 2008. Fylkestinget vil auka ramma med 81 mill, (2003 kroner) for soleis å kunne gjennomføra ein rasfri tilkomstveg i sør gjennom S5 alternativet. Samstundes vert N6 vald på Jondalssida.
Ei fullverdig utbygging med S5+S6+N6 vil gjera sambandet meir attraktivt og dermed gje høgare ÅDT.
Auka kostnad vert finansiert med ein kombinasjon av låneopptak og auke i bompengar.”
Forslaget frå Kristeleg folkeparti fekk partiet sine sju røyster (KrF og Raudt) og fall.
Opsjonar
Fylkestinget godkjenner at også opsjonane 4, 6 og 8, vert innløyst i samband med kontraktsinngåing for bygging av Jondalstunnelen. Opsjon 4 gjeld utviding av tunneltverrsnittet frå T8 til T8,5. Opsjon 6 gjeld at strossing av Bergfjelltunnelen for å auka høgda frå 3,7 m til 4,4 m. Opsjon 8 gjeld deponi på land for N2red.
Kostnad
Den vedteken traseen (S1, S6, 2N red) har ei kostnadsramme på 801,4 mill. kr slik at det er 20 mill. kr i reserve i høve til den godkjende kostnadsramma på 822 mill.kr.
Traseen
S1 omfattar dagens veg mellom Austrepollen og Nordrepollen i Kvinnherad kommune. Det vert bygd ca 500 m ny veg i Nordrepollen. Vidare blir det bygd eit 30 m langt rasoverbygg i betong på sørsida av Bergfjelltunnelen. Tunnelen blir oppgradert med sikkerheitsutstyr og den blir signalregulert, einfelts tunnel. Deler av strekninga på begge sider av Bergfjelltunnelen vert rassikra og det blir sett opp fanggjerde på ca 400 m. Dette blir gjort i eigen rassikringsentreprise.
S6 er det trasealternativet for Jondalstunnelen i Kvinnherad der tunnelpåhogget er lokalisert i Øyresdalen på austsida av Nordrepollen, og vidare ny veg i dagen fram mot S1 og eksisterande veg til Austrepollen.
N2 er trasealternativet for Jondalstunnelen i Jondal der tunnelpåhogget er planlagt i Skipavika, vidare med 500 m lang veg i dagen fram til Gåsevik. Vidare går dette trasealternativet i tunnel bak Torsnes og Ødegård fram til Saltkjelen. Tunnelen bak Torsnes kan byggjast ut i eit seinare byggjetrinn, slik at dette alternativet no som eit første byggjetrinn inkluderer ei opprusting av eksisterande fylkesveg 107 mellom Gåsavik via Torsnes til Saltkjelen.