Den nye 300 kV lina Mongstad-Modalen skal saman med den tidlegare omsøkte lina Mongstad-Kollsnes styrkja nettsituasjonen i bergensområdet.
Kabel i konfliktfylte område
Fylkesutvalet er positiv til at BKK planlegg tiltak for å styrkje forsyningstryggleiken i bergensregionen. I tillegg til meldte trasear bør alternativ med kabling i veg vurderast for strekninga Mofjorden – Modalen og i Matre. Der traseen for den nye 300 KV-lina kjem i konflikt med omsynet til natur- og kulturlandskap og friluftsliv, skal kraftlina leggjast som kabel.
Matre
Ny transformatorstasjon i Matre krev store areal og kan koma i konflikt med område viktig for biologisk mangfald i tillegg til regionalt og lokalt viktige område for friluftsliv. Fylkesutvalet ber om at det vert utgreidd alternative løysingar på dette punktet.
Fylkesutvalet viser til OT.prop. 82 Endring i energilova, der det vert presisert at kabling alltid skal vurderast som alternativ til luftlinje i regional- og sentralnettet.
Kulturminne
Fylkesutvalet ber om at undersøkingsplikta etter kulturminnelova §9 vert oppfylt i samband med konsekvensutgreiinga. Største delen av trasealternativa går gjennom område som ikkje er undersøkt av arkeologar, og ein kan vente å gjere funn av arkeologisk freda kulturminne i utmarks- og fjellområda. Det må påreknast nærare markundersøking for å få oppfylt undersøkingsplikta. Hordaland fylkeskommune kan ikkje gje endeleg fråsegn til ein framtidig konsesjonssøknad før undersøkingsplikta er oppfylt.
BKK sitt forslag
Kraftlina frå Mongstad til Modalen vert 63-73 km lang, i hovudsak som luftline. Kryssing av Fensfjorden er planlagd med kabel av tekniske årsaker. På strekninga Modalen – Vemundsbotnen er det meldt to alternativ, der eit passerer gjennom søre del av Stølsheimen. For resten av strekninga er det berre meldt eit alternativ, og store delar av denne går langs eksisterande 132 kV line. På strekninga Frøyset –Matersdalen vert eksisterande 132 kV line riven i forkant av bygging av 300kV lina. Utbygging er kostnadsrekna til om lag 600 mill kr, og lina kan stå ferdig i 2016 om det vert gjeve endeleg konsesjon i 2012.
Pressemelding med vedtak frå fylkesutvalet 18. juni 2009