Nesten 3000 km fylkesvegar
Frå 1. januar 2010 tek fylkeskommunen over ansvaret for 1 166 km av det som no er omtala som «andre riksvegar». Saman med dagens 1 758 km fylkesvegar vert det frå komande årsskifte 2 924 km fylkesvegar i Hordaland. Frå same tid får fylkeskommunen ansvaret for drifta av 15 av 17 ferjesamband i fylket.
Ferjesambandet mellom Hodnanes på Tysnes og Jektevik på Stord er eitt av dei 15 ferjesambanda fylkeskommunen får ansvaret for frå 1. januar 2010.
Lenkjer
Handlingsprogram for det fylkeskommunale vegnettet i Hordaland 2010-2013 (19). Høyringsutkast.
Høyring av handlingsprogrammet
Rammer
Handlingsprogrammet 2010-2013(19) for det nye fylkesvegnettet legg rammene for investeringar, drift og vedlikehald på det nye fylkesvegnettet i Hordaland.
1,9 milliardar kroner
I fireårsperioden 2010-2013 er investeringsramma på det nye fylkesvegnettet på totalt 1 896 mill. kr. Avslutning av oppstarta prosjekt og oppfylling av førehandsprioriterte prosjekt utgjer 1 688 mill. kr. Det aller meste av dei tilgjengelege midlane i den første fireårsperioden er dermed bundne opp i allereie oppstarta og førehandsprioriterte prosjekt.
Dei store utgiftspostane er knytte til Jondalstunnelen, Bergensprogrammet, refusjon av
forskotteringar og ferdigstilling av prosjekt på det gamle riksvegnettet som skulle ha vore ferdigstilt i perioden 2006-2009.
Satsinga
Sentrale stikkord for satsinga på fylkesvegnettet i Hordaland i perioden 2010-2013 er:
- Oppfylling av eksisterande forpliktingar og ferdigstilling av påbegynte prosjekt
- Sterk satsing på vidareføring av Bergensprogrammet i samarbeid med Bergen kommune
- Prioritering av drift og vedlikehald på vegnettet
- Fokus på å oppretthalde fordelinga i satsinga på høvesvis ”gamle” og ”nye” fylkesvegar
- Vidareføring av 2009-nivå i satsinga på ferjedrifta
- Vidareføring av nivå på programområda (sekkepostane) i høve til perioden 2006-2009
- Oppretting av ein ”til rådvelde”-post som skal ta vare på moglegheiter for mindre
spleiselag etter lokale initiativ
Nye investeringsprosjekt
I første fireårsperioden vert det lagt opp til å setje av 20 mill kroner i fylkeskommunale midlar i 2010 og 2011 til Jensanesvegen (Fv 70) i Stord kommune. I tillegg vert det lagt opp til å starta opp tunnelen bak Tysse i Samnanger kommune med 100 mill kroner i forskotteringar i 2012 og 2013, under føresetnad av at slik forskotteringssøknad vert fremja.
Kvam og Bømlo
Det vert og lagt opp til oppstart av Kvammapakka og Bømlopakka i første fireårsperioden.
I planutkastet er det føreslått å dekka inn det fylkeskommunale bidraget på 43 mill kroner til Kvammapakken i første fireårsperiode frå sekkeposttiltaka (programområda). Anna finansiering av bompengepakkene i første fireårsperiode er bompengar (anna finansiering).
Høyringa
Handlingsprogrammet er sendt på høyring til kommunar, regionråd og interesseorganisasjonar. Høyringsfristen er 1. oktober 2009.
Fylkestinget
Handlingsprogrammet skal handsamast i fylkestinget i desember 2009.