Vedtaket i fylkestinget 25. februar vart gjort med 37 (H, Frp, KrF, V, Sp) mot 20 (Ap, SV, Raudt) røyster.
Fire anlegg
Kjøpet som fylkestinget har godkjent, omfattar Tide sine bussanlegg på Mannsverk og Fanahammeren i Bergen, Lonevåg på Osterøy og Haugland på Askøy. Samla kjøpesum er 235,6 mill. kr.
Anlegget på Haugland skal fylkeskommunen selja vidare til Askøy kommune for 28,8 mill. kr. Fylkeskommunen sin netto kostnad med kjøpet vert på 206,8 mill. kr.
HFK Bussanlegg AS
Fylkestinget har vedteke å oppretta selskapet HFK Bussanlegg AS – heileigd av fylkeskommunen – til å stå som eigar av bussanlegga. Selskapet får ein aksjekapital på 100 000 kr.
Låner 207 mill. kr
Fylkestinget har godkjent opptak av lån på 206,8 mill. kr og vidare utlån av summen til HFK Bussanlegg AS til finansiering av kjøpet.
Anlegga på Mannsverk og Fanahammeren skal nyttast i samband med anbodsdrift av bussrutene i Bergen. Og anlegget i Lonevåg tilsvarande når bussrutene på Osterøy vert lyste ut som ein del av anbodet for Bergen nord.
Fylkestinget sitt vedtak:
1. Fylkestinget godkjenner vedlagde kjøpsavtale med Tide ASA om kjøp av selskapa Tide Eiendom Mannsverk AS, Tide Eiendom Fana AS, Tide Eiendom Lonevåg AS og Tide Eiendom Askøy AS for 235,6 mill. kr.
2. Fylkestinget godkjenner at selskapet HFK Bussanlegg AS vert skipa og løyver kr 100 000 i aksjekapital. Løyvinga vert dekka av fylkesutvalet sin tilleggsløyvingskonto. Fylkestinget godkjenner at dei kjøpte aksjeselskapa vert dotterselskap til HFK Bussanlegg AS og endrar namn i samsvar med det som går fram av saksutgreiinga.
3. Fylkestinget godkjenner opptak av lån på 206,8 mill. kr og vidare utlån av summen til HFK Bussanlegg AS. Fylkesrådmannen får fullmakt til å godkjenna låneavtale mellom HFK Bussanlegg AS og Hordaland fylkeskommune.
4. Fylkestinget gjev fylkesrådmannen fullmakt til å gjennomføra sal av selskapet HFK Bussanlegg Askøy AS – tidlegare Tide Eiendom Askøy AS – til Askøy kommune for 28,6 mill. kr.
Andre forslag
Arbeidarpartiet og Senterpartiet sette fram eit eige forslag som i tillegg til dei fire punkta som er nemnde ovanfor, omfatta desse tre punkta:
5. Fylkestinget føreset at kostnaden ved kjøpa ikkje skal gå ut over tilbodet til kollektivpassasjerane eller dei opparbeidde rettane for dei tilsette og sjåførane.
6. Fylkestinget føreset og at miljøsatsinga, mellom anna ved vidareføring og vidareutvikling av gassbussprosjektet, held fram.
7. Fylkestinget ber om at fylkesrådmannen snarast legg fram ei sak med samla status for økonomi og utvikling i anbodsregimet.
Dette fellesforslaget fekk 24 røyster (Ap, SV, Raudt og Sp) og fall.
Etter at dette forslaget fall, røysta Sp subsidiert på den vedtekne innstillinga frå fylkesutvalet.
Raudt føreslo å utsetja vidare konkurranseutsetjing av bussrutene, inkludert kjøpsavtale med Tida ASA til etter valet i 2011. Forslaget fekk to (Raudt) røyster og fall.