Anna Elisa Tryti er tilsett som ny fylkeskultursjef i Hordaland. Ho er no rådmann i Naustdal kommune i Sogn og Fjordane.
Tryti (f. 1958) er utdanna historikar med kompetanse som førsteamanuensis i norsk og europeisk mellomalderhistorie.
Yrkesbakgrunn
Hordaland fylkeskommune sin nye kultursjef har ein variert og allsidig yrkesbakgrunn både frå administrativt og politisk nivå. Ho har hatt ei rekkje jobbar og stillingar ved Universitetet i Bergen. Innan kulturfeltet har ho hatt fleire stillingar. I åra 1997-2002 var ho styreleiar og seinare dagleg leiar for Bergen Byformsenter (Vestform). Deretter var ho i perioden 2003-06 generalsekretær i Noregs Musikkorps Forbund. Frå 2006 har ho vore rådmann i Naustdal kommune.
Politisk karriere
I perioden 1992-95 var Anna Elisa Tryti kommunalråd for byutvikling og formann for bygningsrådet i Bergen. På 1980-90-talet hadde ho ei rekkje styreverv og andre tillitsverv i Det norske Arbeiderparti.
Ho har også hatt ei lang rekkje verv i organisasjonar og institusjonar knytte til arkitektur, plan. bygg- og anlegg. I 1996-98 var ho styreleiar i Norsk Form og i 1996-2000 var ho leiar av Statens Byggeskikkutvalg. Også innan forsking- og utdanning er ho engasjert. På 1990-talet var ho medlem i forskingsutvalet til Kommunenes Sentralforbund. Sidan 2003 har ho vore medlem i styret for Høgskolen i Bergen.
Stanley Hauge 23.12.2009 12:41