Fylkesordførar Torill Selsvold Nyborg overrakte Ung Poesi-prisen til 23 år gamle Erlend O. Nødtvedt frå Fyllingsdalen.
Ulvik Poesifestival – Olav H Hauge-dagane er med og markerer 100-årsjubileet for diktaren Olav H Hauge og komponisten og pianisten Geirr Tveitt. Me i Hordaland fylkeskommune saman med mange andre har vore ein pådrivar for å få til ei så stor markering av jubileumsåret som det har blitt. Ser ein på lista over arrangement, viser den at Hauge og Tveitt er svært skatta av alle, både lokalt, nasjonalt og internasjonalt, påpeika fylkesordførar Torill Selsvold Nyborg i sin opningstale.
Ho la til at i haust er det arrangement frå Bodø til Beijing, og ein kan oppleva konsertar, teaterframsyningar, opplesingar, utstillingar og seminar. Dette året kjem det ut fleire nye bøker om dei to kunstnarane, og fylkeskommunen har støtta eit dokumentasjonssenter i Ulvik for Hauge sin forfattarskap.
Naboskap
Eit undertema på festivalen i år var naboskap. Folk bur i eit nabolag der dei har felleskap med naboane sine, mykje eller mindre. Naboskap er også det meir fjerne og store, med område og statar. Temaet naboskap høver godt saman med at 2008 er eit markeringsår for kulturelt mangfald. Å møte dette mangfaldet kan utfordra oss, men det kan også gjera møtestundene og samtalane rikare om vi torer å opna fleire sider av oss sjølve for kvarandre.
Samspelet mellom Armboltprisvinnar Robbert Bly og Knut Hamre var nærast elektrisk under Ulvik Poesifestival.
Dette vart på mange måtar understreka av ein særs opplagd vinnar av Armbolt-prisen, den amerikanske poeten Robert Bly. I gnistrande samspel med fiolonisten Knut Hamre frå Granvin gav dei publikum ei stor oppleving av Hauge sine dikt.
23-åringen Erlend O. Nødtvedt frå Fyllingsdalen fekk Ung Poesi-prisen på 10.000 kroner og fekk stor applaus for si opplesing frå vinnarmaterialet i "Harudes".
Hordaland: Prisdryss i Ulvik
Opningstalen til fylkesordførar Torill Selsvold Nyborg
Ung Poesi-prisen 2008
Ulvik Poesifestival 2008