Fleirtalet i Fylkesutvalet er positive til at Geitåni kraftverk i Voss kommune får konsesjon. Eit samrøystes Kultur- og ressursutval gjekk i mot å tilrå konsesjon.
Fallrettseigarar i Geitåni og Ørevikelvi i Voss kommune ynskjer i samarbeid med KraftkaraneAS å byggje Geitåni kraftverk gjennom eit felles selskap Geitåni Kraft. Utbygginga har inntak i Geitåni på kote 297 og utløp i Evangervatnet på kote 12. Med overføring av naboelva Ørevikelvi og bekk frå Storemyri vil utbygginga kunne gje 19GWh ny kraft.
Vassføringa vert vesentleg redusert i Hovmannafossen medan Ørevikelvi vert turrlagd i delar av året.
I saka rår Kultur- og ressursutvalet frå å gje løyve til omsøkt utbygging då kraftverket vil råke både automatisk freda kulturminne og verneverdig trase for postvegen. Ei eventuell utbygging slik søknaden ligg føre vil måtte vurderast opp mot Kulturminnelova.
Etter framlegg frå Tom-Christer Nilsen (H) røysta fleirtalet med 9 utvalsmedlemer (H, Frp, KrF,Sp) for fylgjande fråsegn:
1. Fylkesutvalet er grunnleggjande positiv til ny fornybar energiproduksjon, under føresetnad av at det vert teke omsyn til aktuelle areal- og miljøutfordringar.
2. Fylkesutvalet rår til at det vert gjeve konsesjon til Geitåni kraftverk i Voss kommune.
3. Det vert sett krav om ei minstevasføring i Geitåni og Ørevikselvi.
4. Det vert føresett at det vert teke omsyn til automatisk freda kulturminne.
Simon Sortland 01.10.2008 09:30