Årstad tannklinikk er godkjent som miljøfyrtårn. – De har gjort ein god jobb, sa ordførar Gunnar Bakke i Bergen då han overrekte miljøsertifikatet til klinikksjef Trond Augustson under ein seremoni i rådhuset.
Nokre av dei tilsette ved Årstad tannklinikk med miljøsertifikatet: Karen Hofland (f.v.), Nina Herdlevær, Arne Åsan (overtannlege i distrikt sentrum), Trond Augustson (klinikksjef og kvalitetskoordinator i Den offentlege tannhelsetenesta i Hordaland), Sigrun Bru, Siren Vatshelle og Anne-Gro Ullaland (prosjektleiar i Hordaland fylkeskommune). (alle foto: Bjarte Brask Eriksen)
I nye lokale
Årstad tannklinikk flytta inn i nye lokale i mai 2007 og etter det starta arbeidet med å miljøsertifisere klinikken.
– Tannklinikken har innført kjeldesortering, redusert avfallsmengde og slutta å bruke eingongsartiklar. Energibruken og støynivået er gått ned. Arbeidsplassane er ergonomisk tilrettelagde og fleire tilsette går og syklar til jobb. Det er flott at vi har ein tannklinikk som er miljøsertifisert, sa ordførar Gunnar Bakke.
Den tredje i fylkeskommunen
Årstad tannklinikk er den tredje institusjonen i Hordaland fylkeskommune som er miljøsertifisert og den andre offentlege tannklinikken i fylket. Askøy vidaregåande skule var første ute og deretter Sørås tannklinikk. Neste ut i Hordaland fylkeskommune blir Nesttun tannklinikk der miljøsertifiseringa starta 30. september.
Ansvarleg
Spesialrådgjevar Anne-Gro Ullaland har ansvaret for miljøsertifiseringa i Hordaland fylkeskommune.
Ordførar Gunnar Bakke overrekte miljøsertifikatet til klinikksjef Trond Augustson.