I fylkeskommunen sine samarbeidsbyar Edinburgh og Cardiff vert det også i år julemarkeringar med kulturinnslag frå Hordaland. I Edinburgh skjer det torsdag 27. november og i Cardiff søndag 30. november.
Konsertar
Begge stader vert det konsertar med musikarane Anne Nitter Sandvik (piano), Knut Hamre (hardingfele) og Kersti Stråbi (svensk songar).
Ved arrangementa i Edinburgh 27. november deltek fylkesordførar Torill Selsvold Nyborg. I Cardiff søndag 30. november er det fylkesvaraordførar Tom-Christer Nilsen som leier hordalandsdelegasjonen.
Folkesongar og klassisk musikk
På konsertprogrammet står folkemusikk frå Hordaland kombinert med tradisjonell song frå Hälsingland i Sverige. Komponistar som Edvard Grieg og svenske Wilhelm Petterson Berger brukte begge folkemusikk som kjelde og inspirasjon for mange av komposisjonane sine. Nokre av deira musikkverk vert framførde på konserten.
Klassiske perler og julerelatert musikk står også på programmet.
Edinburgh
«Hordalandstreet» i Edinburgh vert tent torsdag 27. november like etter kl. 18.00. Deretter står adventskonsert i St. Giles’ Cathedral på programmet kl. 19.00.
Cardiff
I Cardiff vert det juletretenning søndag 30. november kl. 16.30 ved den norske kyrkja (den oppattbygde sjømannskyrkja) i hamneområdet. Deretter vert det konsert kl. 17.30.
Orknøyane
På Orknøyane vert det førjulsarrangement 5.-7. desember.
Stanley Hauge 26.11.2008 15:30