Den mangfaldige vandreutstillinga «Sjekk det håret» er eitt av Hordaland fylkeskommune sine bidrag i Mangfaldsåret 2008. Utstillinga vert opna på Osterøy museum onsdag 12. mars kl 12.30 av fylkesordførar Torill Selsvold Nyborg.
Intimt – og offentleg- Berre for dei næraste – og for alle å sjå
- Lokalt og internasjonalt
- Heilagt og «big business»
- På tvers av tid, tru, skikk og bruk
Kva desse stikkorda gjeld? Håret vårt, sjølvsagt – tema for vandreutstillinga «SJEKK DET HÅRET».
Leikande innfallsport
Hår kan studerast i dei fleste samanhangar, og er vald som ein ypparleg og leikande innfallsport til å skapa større medvit om eigen og andre sin kultur, og auka toleransen for kulturelt mangfald i dagens samfunn.
Vandreutstilling i to år
Utstillinga er særleg retta mot ungdomsskuleelevar, og Den kulturelle skulesekken syter for at vandreutstillinga skal nå ungdomsskuleelevar i heile Hordaland dei neste 2 åra.
Elevoppgåver
Moderne formidlingsteknikk kopla med velrøynde utstillingsmåtar er tekne i bruk for å auka oppleving, innsikt og engasjement. Tilhøyrande undervisningsopplegg og nettsider vil inspirera elevane til å arbeida vidare på eiga hand med dette mangfaldige temaet. Elevane kan sjølve ta del i det vidare utstillingsarbeidet.
Myldrande samarbeid
Utstillinga er laga i eit myldrande samarbeid mellom arkiv, bibliotek og musè i Hordaland og Hordaland fylkeskommune, og har vore eit stort regionalt løft. Prosjektet har også fått solid støtte frå AMB-utvikling.