22 elevar i Hordaland deltek på sommarskulen i Bergen for å bli betre i norsk eller matematikk. Alle foto: Bjarte Brask Eriksen
Samarbeid
Sommarskulen er eit samarbeid mellom fylkeskommunen og Bergen Røde kors. Tiltaket kom i gang i fjor som eit ledd i satsinga mot fråfall i den vidaregåande skulen og som ei vidareføring av leksehjelpsatsinga til Røde Kors.
Mest populær
Matematikk er mest populært med 15 elevar, mens 7 skal ta norsk. Åtte friviljuge i Røde Kors, to sivilarbeidarar og fire lærarar, to i kvart fag, skal ta seg av undervisinga, og legge til rettes for god læring. Mellom anna får elevane servert mat og drikke.
10 ulike språk
Dei 22 elevane skal anten betre kunnskapen for å stå betre rusta i den vidaregåande skulen, eller fullføre eksamen før dei skal vidare i livet, i jobb eller høgare utdanning. Og nokre skal starte i den vidaregåande skulen til hausten og ønskjer å vere betre førebudde til utfordringane som ventar. Dei 15 elevane kjem frå 12 ulike skular i fylket og representerer 10 ulike språk.
Frå stryk til fire
Petter Borthen opna sommarskulen.
– Det viser seg at dei fleste elevar som anten sluttar eller brukar fleire år enn planlagt på vidaregåande opplæring, har problem med enkeltfag. Ein god del stryk i enkeltfag. Sommarskulen og leksehjelpgruppene trur vi er eit viktig bidrag til at fleire vil fullføre skulegangen, sa Borthen.
Resultatet frå eksamen ved sommarskulen i fjor var at alle fekk bra resultat. Og fleire av dei gjekk frå å ha hatt strykkarakter til å få fire.
Populær leksehjelp
Som takk til prosjektleiar for sommarskulen, Jostein Gimmestad i Bergen Røde Kors overrekte Borthen overrekte blomster. Røde Kors driv i dag 27 leksehjelpgrupper i Hordaland. 10 av desse er eit tilbod til elevar over 15 år. Målet til Røde Kors er å doble tal grupper for elevar i den vidaregåande skulen.
– Bruk gruppene og ta kontakt med Røde Kors om de ønskjer leksehjelpgruppe ved dykkar skule, sa Petter Borthen som er prosjektleiar for tiltak mot fråfall i den vidaregåande skulen i Hordaland.
Petter Borthen (t.h.), initiativtakar til sommarskulen i Hordaland fylkeskommune, overrekker blomster til prosjektleiar for sommarskulen, Jostein Gimmestad i Bergen Røde Kors.
Fire lærarar, åtte friviljuge i Røde Kors og to sivilarbeidarar skal legge til rette for at elevane får to lærerike veker.