Ein delegasjon frå Orknøyane er på gjesting i Hordaland 13.-17. juni. Det er i år 25 år sidan venskapsavtalen mellom Hordaland og Orknøyane var inngått, og jubileet skal markerast under gjestinga.
Orknøy-delegasjon med ordførar Stephen Hagan i spissen, vart teken imot at fylkesordførar Torill Selsvold Nyborg på Flesland fredag ettermiddag (13. juni).
Program
På programmet under gjestinga står velkomstmiddag i dei nyrestaurerte lokala på Stend hovudgard fredag 13. juni. Laurdag 14. juni går turen til museumssenteret i Salhus. Søndag 15. juni går turen Havråtunet og Osterøy museum og spasertur på Kossdalsvegen.
Måndag 16. juni vert det møte i Fylkeshuset. Der skal Hordaland fylkeskommunen presentera det regionale utviklingsprogrammet sitt. Orknøyane skal presentera sin kommune- og strukturplan.
Skulebygg
Etter lunsj måndag går turen til Tertnes videregående skole og synfaring der. Eigedomssjef Helge Haavardtun skal på føremiddagsøkta presentera Hordaland fylkeskommune sitt utbyggingsprogram i skulesektoren.
Avtale frå 1983
Venskapsavtalen med Orknøyane var den første Hordaland fylkeskommune oppretta. Det skjedde på Voss i 1983. Avtalen vart fornya i 2003.
Kontakta
Utvekslinga mellom Hordaland og Orknøyane har særleg omfatta ungdom og har hovudsakleg skjedd innan kultur og undervisning. I 20 år har det årleg kome to elevar frå Orknøyane og hit til eit skuleår ved Voss folkehøgskule. Dei siste 16-17 åra har Hordaland sendt elevar til tilsvarande opphald på Orknøyane. «Ein heil klasse» hordalendingar har såleis eit skuleår bak seg i venskapsfylket vest i havet.