Med ESA-godkjenninga på plass må regjeringa syta for at utbyggingsplanen for Testsenteret for CO2-reinsing på Mongstad vert følgd opp i samsvar med framdriftsplanen slik at det kjem i drift seinast i 2011, seier fylkesordførar Torill Selsvold Nyborg.
Fylkesordføraren er glad for at EFTA sitt overvakingsorgan ESA i dag (onsdag 16. juli 2008) har avgjort at det ikkje skal setjast i gang formelle undersøkingar av statstøtte til testsenteret for CO2-reinsing på Mongstad (TCM). Slike undersøkingar kunne ha teke inntil halvtanna år.
ESA har gjeve klarsignal til at det kan gjevast statsstøtte til finansiering av testanlegg for CO2-reinsing på Mongstad.
Utan nye utsetjingar
– Med ESA si avgjerd ligg det til rette for at staten og StatoilHydro med samarbeidspartar kan gjera nødvendige investeringsvedtak i haust. Realiseringa av testanlegget ventar eg då vil skje utan nye utsetjingar, seier fylkesordførar Selsvold Nyborg.
Seinast i 2011
– Me ser med store forventingar fram til å få testanlegget i drift seinast i 2011 og deretter fullskala CO2-reinsing frå 2014, slik regjeringa har lova med sitt «månelandingsprosjekt», seier fylkesordføraren.
Kontaktperson:
Fylkesordførar Torill Selsvold Nyborg – mob. 915 22 733
Lenkjer:
CO2-håndtering på Mongstad (Regjeringa sitt opplegg februar 2008)
ESA godkjenner Mongstad – finansiering (Olje- og energidepartementet)
ESA godkjenner Mongstad-finansiering (Statsministeren)
Regjeringa må satsa på Mongstad som CO2-sentral (Fylkesordføraren desember 2007)