Nina Ludvigsen er ny leiar av OT/PPT-tenesta i Hordaland. (foto: Bjarte Brask Eriksen).
Ludvigsen kom frå stillinga som regionleiar for Region Sør, ein av dei fem regionane til OT/PPT-tenesta i Hordaland, ei stilling ho har hatt dei siste fem åra. Før det var ho tre år ved Opplæringsavdelinga som kontorsjef og rådgjevar.
Distriktsarbeidssjef
Bakgrunnen hennar elles er mange år som distriktsarbeidssjef i Aetat, dessutan halvtanna år i Bergen kommune som personalsjef då bydelsreforma starta som prøveprosjekt i Arna bydel.
Tilbod til alle
OT/PPT-tenesta i Hordaland har om lag 40 tilsette og er delt inn i fem regionar. Klientane er all ungdom frå 16 år og oppover.
– Så lenge dei har rett til vidaregåande opplæring, har dei rett på tenestene våre. Vi arbeider for at dei som sluttar skulen eller står i fare for å slutte, skal få eit tilbod, seier Ludvigsen.
Skal hjelpe så tidleg som mogeleg
Etter at Kunnskapsløftet vart innført er OT/PPT-arbeidet gått over til å bli meir førebyggjande.
– Vi freistar å kome inn så tidleg som mogeleg for å hindre fråfallet i skulen. Det er spennande med Kunnskapsløftet og at vi skal vere i forkant med kompetansen skulen treng av oss. Det er ei utfordring å samarbeide både med skulane og heile NAV-systemet. Vi har mange samarbeidspartnarar, og gjennom samarbeid med andre gjev vi dei unge hjelp og viser veg vidare. Dette kan vere opplæring eller kvalifisering for jobb, seier den nytilsette OT/PPT-leiaren Nina Ludvigsen.
Trappa ned
Tidlegare leiar av OT/PPT-tenesta i Hordaland, Sigrid Andersen, fylte 60 år i fjor haust og har trappa ned og blitt seniorrådgjevar ved OT/PPT-tenesta.