– Me trur det vil ha stor signalverdi for prosjektet at fylkeskommunen løyver midlar, seier utvalsleiar Helge Andre Njåstad. – Me vonar at dette signalet vil medverka til at også andre aktørar sluttar opp om prosjektet slik at det kan gjennomførast som planlagt.
– Me trur det vil ha stor signalverdi at fylkeskommunen løyver midlar til regionshistoria om Hardanger, seier utvalsleiar Helge Andre Njåstad.
God tradisjon
Hordaland fylkeskommune ser ei viktig regional kulturpolitisk rolle i å medverka til realisering av historieverk om regionen. Fylkeskommunen har også tidlegare stått sentralt i utviklinga av fleire slike verk. Regionshistoriske verk er viktige for å danne fundament for naudsynt kunnskap om og forståing av regionen vår, og utgjer ei rik kjelde for det kulturelle tilfanget vårt.
Raskt vedtak
– Kultur- og ressursutvalet fann dette prosjektet så interessant at me valde å nytte heile 250 000 kr frå utvalet sin disposisjonskonto for å kunne gjere eit raskt positivt vedtak om deltaking. Ytterlegare løyving til prosjektet vil bli vurdert i samband med budsjettet for 2009, seier utvalsleiaren.
Hardanger historielag
– Me ynskjer Hardanger historielag lukke til med dette viktige arbeidet og er svært fornøgde med at Hordaland fylkeskommune vert ein viktig aktør for å realisera regionshistoria for Hardanger.
Heile kultur- og ressursutvalet gjekk inn for å løyva tilskot til regionshistoria for Hardanger. 10 representantar røysta for 250 000 kr, medan to (SV og Rødt) ville løyva 300 000 kr.