Fylkestinget i Hordaland vedtok 9. desember budsjettet for 2009 med dei nemnde endringane i høve til fylkesrådmannen sitt forslag.
Fylkestinget vedtok samarbeidspartia Høgre, Fremskrittspartiet og Kristeleg folkeparti sitt forslag til budsjett. (Vedteke med 29 røyster (H, Frp, KrF).
Sjå: Fylkesbudsjett på over 5,3 milliardar kroner
Eigne forslag
Arbeidarpartiet, SV, Venstre og Sp fremja eigne budsjettforslag som i hovudsak fekk forslagspartia sine røyster. Ap, SV og Sp fremja felles tekstforslag. Dette forslaget fekk 24 røyster (Ap, SV, SP, Raudt) og fall.
Påplussingane
Det vedtekne forslaget frå H, Frp, KrF, omfattar slike påplussingar i høve til fylkesrådmannen sitt forslag:
Opplæring
Til oppfølging av forvaltingsrevisjonsrapporten om vidaregåande skular vert løyvd 1,2 mill. kr. Til auka innsats mot bortval (fråfall) i skulen vert det plussa på 750 000 kr. Til TAF-ordninga vert det løyvd 1,0 mill. kr for å få i gang slikt tilbod i Sunnhordland (Kvinnherad/Stord) i samarbeid med næringslivet der. Like eins vert det løyvd 0,5 mill. kr til oppføling av bibliotekplanen for skulane.
Samla påplussing til drift 3,45 mill. kr.
Investeringsbudsjettet vert styrkt med 10 mill. kr til utstyr ved dei vidaregåande skulane, som vil gje ei dobling i høve til årets løyving.
Samferdsel
Løyvinga til fylkesvegvedlikehalde vert styrkt med 1 mill. kr og det vert sett av 0,5 mill. kr til informasjonstiltak i samband med nytt billetteringssystem og ymse nye tiltak innan kollektivtrafikken.
Til Forum nye Bergensbanen er løyvd 100 000 kr. 750 000 kr er sett av til å la samordninga av miljøkort på Voss og Stord med dei ordinære periodekortordningane, skje over lengre tid enn det som er opplegget i fylkesrådmannen sitt budsjettforslag.
Samla påplussing til drift samferdsel: 2,35 mill. kr.
På investeringsbudsjettet vert det løyvd 2,5 mill. kr til opprusting av bruer på fylkesvegane.
Kultur og idrett
Fylkestinget vedtok løyvingar til nokre nye tiltak og påplussingar av ei rekkje andre innan kultur og idrett, i alt 2,85 mill. kr fordelt slik:
500 000 kr Pilgrimssenter Røldal prosjektstøtte
300 000 kr Vestnorsk utvandrersenter
150 000 kr Moster Amfi
100 000 kr Bullahuset
100 000 kr Stend hovedgård
200 000 kr Idrettsplan
200 000 kr Folkehelse/MOT
500 000 kr Friluftsrådet
100 000 kr Arboreet
100 000 kr Trallebane Ålvik prosjektstøtte
250 000 kr Bergen bymuseum
150 000 kr Kunstmuseene
100 000 kr Bergen Kunsthall
50 000 kr Vestnorsk filmsenter
50 000 kr Vestnorsk Jazzsenter
I ein merknad seier fylkestinget at årleg støtte til utvandrarsenteret føreset at dei blir ein del av den rullerte museumsplanen og dei konsoliderte musea.
Andre tiltak
Til sjukefråversprosjekt (PREP) vert det sett av 100 000 kr.
Dei samla påplussingane på 10 mill. kr til drifta, er vert finanserte med 7,5 mill. kr frå disposisjonsfond og 2,5 mill. kr i midlar frå momskompensasjonsordninga.
I samband med at investeringsbudsjettet vert auka med 12,5 mill. kr med støre låneopptak, er det sett av 1,25 mill. kr meir til renter og avdrag.
Vedtekne tekstforslag
Fylkestinget vedtok ei rekkje tekstforslag frå Høgre, Fremskrittspartiet og Kristeleg folkeparti. Fylkestinget ber om nærare vurdering av ei rekkje tiltak som ein eventuelt vil koma attende med løyving til seinare.
Fylkestinget ber om:
- Sak med vurdering av moglegheitene for å utvida ungdomskortet med eitt årskull eller utvida studentkortet til studentar over 30 år.
- Sak om ei sonejustering i Sunnhordland som reduserer reisekostnadene innanfor same ramme som dagens miljøkort.
- Sak med framlegg til tiltak som kan bidra til å halda på den høge kollektivdelen som no er i Bergen.
- Oppretting av eit Kulturelt Utviklingsprogram (KUP) som del av RUP med ei førebels ramme av regionale midlar på 3,5-4 mill. kr. (Vedteke med 33 røyster (H, Frp, KrF, V, Raudt.)
- Sak om vilkår og utsikter til bruk av biogass i buss i Bergen. (Vedteke med 33 røyster (H, Frp, KrF, V, Raudt.)
- Sak om nivået på kost/vask – driftskontraktar med vurdering av mogleg overføring til vedlikehald.
Forslag som fall
Arbeidarpartiet(pdf-fil)
Arbeidarpartiet føreslo endringar for i alt 45,1 mill. kr i høve til fylkesrådmannen sitt forslag. Ap ville plussa på 6,5 mill. kr til opplæring, 0,5 mill. kr til regional utvikling, 2,1 mill. kr til kultur og idrett, 34 mill. kr til samferdsel, 1,5 mill. kr til tannhelse og 0,5 mill. kr til personalpolitiske tiltak.
Innan samferdsel reknar Ap med å få 30 mill. kr meir i tilskot frå dei statlege belønningsmidlane til kollektivtrafikk. Desse midlane vil dei bruka til takstfrys og betre kollektivtrafikktilbod.
Til inndekking ut over 30 mill. kr i auka tilskot, ville Ap kutta 7,5 mill. kr i avsetjing til fond, redusera støtte til Business region Bergen med 2 mill. kr, setja ned lønsavsetjinga med 4 mill. kr og redusera tilleggsløyvingskontoen til fylkesutvalet med 1,6 mill. kr.
Forslaget fekk 14 røyster (Ap) og fall.
Sosialistisk Venstreparti(pdf-fil)
Sosialistisk venstreparti føreslo påplussing med 1,9 mill. kr til tannhelse, 11 mill. kr til opplæring og 1,9 mill. kr til kultur. Innan samferdsel føreslo SV 20 mill. kr meir til kollektivtrafikken, av dette 16 mill. kr til takstfrys. Til fylkesvegar ville SV løyva 3 mill. kr meir.
For å dekka inn påplussingane budsjetterer SV mellom anna med 20 mill. kr i auka tilskot frå statlege belønningsmidlar til kollektivtrafikken, bruk av 7,5 mill. kr i udisponerte fondsmidlar, reduksjon i lønsavsetjinga med 3,5 mill. kr, stryka løyving på 5 mill. kr til Business region Bergen.
Forslaget fekk 4 røyster (SV) og fall.
Venstre (pdf-fil)
Venstre føreslo endringar på i alt 64 mill. kr. Til samferdsel vil Venstre bruka 26,5 mill. kr meir , til opplæring 10,6 mill. kr, 3,4 mill. kr meir til kultur og idrett og 23,5 mill. kr til investeringar i infrastruktur for kollektivtrafikken.
Til inndekking føreslo Venstre 35 mill. kr i auka tilskot frå statlege belønningsmidlar til kollektivtrafikken, 15 mill. kr i inntekt frå køprising, bruk av 7,5 mill. kr i udisponerte fondsmidlar, reduksjon i lønsavsetjinga med 4,0 mill. kr og 2,5 mill. kr frå momskompensasjon.
Venstre hadde også ei rekkje verbalpunkt i forslaget sitt.
Forslaget fekk 2 røyster (V) og fall.
Senterpartiet (pdf-fil)
Senterpartiet føreslo endringar for 31 mill. kr. Sp ville plussa på 6,2 mill. kr til opplæring, 23 mill. kr til samferdsel og 1,8 mill. kr til kultur og idrett.
Til inndekking føreslo Senterpartiet 16 mill. kr i auka tilskot frå statlege belønningsmidlar til kollektivtrafikken, bruk av 7,5 mill. kr i udisponerte fondsmidlar, reduksjon i lønsavsetjinga med 6,0 mill. kr og 1,5 mill. kr i reduksjon i fylkesutvalet sin tilleggsløyvingskonto.
Forslaget fekk 4 røyster (Sp) og fall.
Raudt (pdf-fil)
Raudt føreslo endring for 50 mill. kr. Til opplæring føreslo Raudt 35 mill. kr meir, til samferdsel 9,6 mill. kr, til tannhelse 3,4 mill. kr og til kultur 1,3 mill. kr. Til investeringar føreslo Raudt 5 mill. kr til arbeidsløysefond.
Raudt føreslo kutt på 3,7 mill. kr til regional utvikling og 0,6 mill. kr i budsjettet til administrasjon. Til inndekking budsjetterer Raudt også med 50 mill. kr i auka overføring frå staten.
Raudt hadde også ei rekkje verbalpunkt i forslaget sitt.
Forslaget fekk 2 røyster (Raudt) og fall.
Felles verbalforslag Ap, Sp, SV (pdf-fil)
Ap, SV og Sp fremja felles verbalforslag med ei rekkje punkt. Dette forslaget fekk 24 røyster (Ap, SV, SP, Raudt) og fall.