Fylkesutvalet rår til at Hordaland fylkesting skal vedta den reviderte søknaden frå Regionrådet i Nordhordland om bompengefinansiering av Nordhordlandspakka fase 1. Tilrådinga er gjort med 11 (H, KrF, Ap, Sp, V) mot fire (FrP, SV) røystar.
Fylkestinget avgjer saka på møte i morgon, 24. april.
Fylkesutvalet går inn for at det lokalt vert arbeidd for å gjennomføra Nyborgtunnelen som bompenge-prosjekt i fase 2 av Nordhordlandspakka når den statlege medfinansieringa til prosjektet er meir avklart.
Med bakgrunn i dei råmene som no ligg inne i forslag til NTP rår fylkesutvalet til at fylkestinget skal be om at Regionrådet for Nordhordland og kommunane i Nordhordland revurderer føresetnaden i bompengesøknaden om minimum 50 % statleg medfinansiering fram mot handsaminga av handlingsprogrammet for NTP 2010-2019 i fylkestinget våren 2009.
Nordhordlandspakka fase ein omfattar prosjekt som er kostnadsrekna til 832 mill. kr (2006-kr). Det er føresett ei samla statleg løyving på 422 mill. kr. Dei største einskildprosjekta er Rv 565 Tolleshaug-Soltveit (Radøy) til 393 mill. kr og E39 Eikåstunnelen (Bergen) til 153 mill. kr. Sistnemnde er planlagt fullt ut finansiert med statsmidlar.