Samferdselsutvalet skal ha ekstramøte torsdag 11. oktober om Bybanen i Bergen. Møtet vert halde som telefonmøte og tek til kl. 12.00. Utvalsleiar Gustav Bahus vil leia møtet frå møterom i Fylkeshuset, Agnes Mowinckels gate 5, Bergen.
Auka kostnader
I samband med anbodsopninga på bybaneprosjektet viser det seg at kostnadene går ut over kostnadsramma som låg til grunn for prosjektet då Stortinget handsama proposisjonen for bybana. Kostnadsauken fører til at saka må handsamast på nytt i Stortinget.
Unngå seinkingar
For å unngå uheldige forseinkingar med gjennomføringa av prosjektet er det lagt opp til at dei nye kostnadstala for bybana vil verta lagde fram for Stortinget i den noverande sesjonen. I forkant av dette er det nødvendig med ei rask lokal avklaring av finansieringsopplegget for meirkostnadene.
Fylkestinget 16. oktober
Det vert lagt opp til at fylkestinget skal handsama saka tysdag 16. oktober. Før det skal saka handsamast i omframt møte i samferdselsutvalet og som tilleggssak i fylkesutvalet sitt møte fredag 12. oktober. Bergen kommune legg opp til å handsama saka i bystyret måndag 15. oktober.