Prosjektansvarleg Gro Jensen Gjerde i Samarbeidsrådet for Sunnhordland, administrerande direktør Rita Brokstad i Tide Reiser, fylkesordførar Torill Selsvold Nyborg, prosjektleiar Helge Møller i Reisemål Hardanger Fjord AS, Thomas Mælen i Fjord Tours og administrerande kaptein Magnus Ådnanes i Rødne Fjordcruise presenterte dei første knallgode resultata frå prosjektet Explore Hardangerfjord – Sesongutviding på Fjorden onsdag ettermiddag.
Explore Hardangerfjord – Sesongutviding på Fjorden, er eit prosjekt som vart starta sesongen 2007. Hovudmålsettinga med prosjektet er å utvida turistsesongen i Hardanger og Sunnhordland.
- Prosjektet skal føra til auka trafikk til områda, slik at gjestene vert verande lengre, dei nyttar i aukande grad attraksjons- og aktivitetstilboda og legg meir pengar att i områda. Det vil og verte arbeidd med å utvikla produktpakkar som kan gje heilårseffekt, opplyste han vidare på ein pressekonferanse i Bergen i dag.
Hardanger og Kvinnherad
Prosjektet har ei tidsramme som går ut 2009 og er eit samarbeidsprosjekt mellom Reisemål Hardanger Fjord AS, Samarbeidsrådet for Sunnhordland IKS, Hordaland fylkeskommune, Innovasjon Norge Hordaland, Hardangerrådet, Kvinnherad kommune og reiselivsnæringa i Hardanger og Sunnhordland. Budsjettramma er på 4,6 mill kr og Hordaland fylkeskommune er inne med 3,3 mill kr i denne satsinga. Geografisk område for satsinga er Hardanger og Kvinnherad.
Resultata syner at turistruta på Hardangerfjorden har hatt ein oppgang på 4300 passasjerar frå 2006 til 2007. Totalt har 12.971 passasjerar nytta dette turisttilbodet sesongen 2007 – ein auke på 49 prosent. Den nye heilårsruta frå Bergen til Rosendal (Hardangerfjordekspressen) har i sommarsesongen (mai– eptember) hatt 11.375 passasjerar, der ein stor del av dette kan tilskrivast turistsatsinga. Vidare har mange attraksjonar rapportert om gode besøkstal denne sommaren.
- Dei gode resultata for 2007, gjer at vi går på det vidare prosjektarbeidet med friskt mot og føler oss trygge på at satsinga vil verta eit solid tilskot til reiselivsnæringa i Hardanger og Sunnhordland i åra som kjem, seier prosjektleiar Helge Møller i Reisemål Hardanger Fjord AS.
Gode tal for turistrutene på Hardangerfjorden (pdf)