Ferjene i fylkesvegsambanda i Hordaland skal lysast ut på anbod, har fylkestinget vedteke. Vedtake er gjort mot 8 (SV, RV) røyster.
Den fylkeskommunale delen av dei tre kombinerte riks- og fylkevegferjesambanda Jektevik-Hodnanes-Nordhuglo, Gjermundshamn-Løfallstrand-Varaldsøy og Skånevik-Utåker-Matre skal inngå i konkurranseutsetjinga av riksvegferjedelen.
Også fylkesvegferjesambandet Fjelberg-Sydnes-Utbjoa-Skjersholmane skal ut på anbod, har fylkestinget vedteke.
Fylkestinget legg til grunn at konkurranseutsetting av dei aktuelle sambanda må gjennomførast i nært samarbeid med fylkeskommunen på administrativt og politisk nivå, samt berørte kommunar, før anboda vert lagde ut.
Bjørn Lothe (SV) fremja forslag om at «Fylkestinget går inn for at korkje riks- eller fylkesferjesamband skal konkurranseutsetjast – men halde fram med rammeavtalar som no.» Forslaget fekk åtte (SV, RV) røyster.