Dette går fram av fylkesrådmannen sitt utkast til fylkesbudsjett for 2008 og økonomiplan for åra 2008-2011.
Takstfrys og priskutt
For femte året på rad gjennomfører fylkeskommunen takstfrys. I tillegg vert det i 2008 prisreduksjon på reiser mellom Bergen og resten av fylket.
Nyordninga med ein takst (23 kr) i Bergen vert vidareført når forsøksperioden går ut ved årsskiftet og fylkeskommunen på ny får ansvaret for kollektivtilbodet i Bergen. Frå nyttår vert takstane for reiser mellom Bergen og resten av fylket harmoniserte ved at billettprisen vert kutta tilsvarande ei takstsone.
Billettsystem og bybane
Prioriteringa av kollektivtrafikken omfattar også innføring av nytt billetteringssystem og kjøp av vogner til Bybanen i Bergen.
Investeringar
Satsinga på vidaregåande opplæring går tydeleg fram av investeringsopplegget for 2008-2011: 1 359,9 mill. kr skal investerast i skulebygg og andre tiltak i sektoren.
Investeringsbudsjettet for 2008 vert på 583,9 mill. kr. Hovudinnsatsområda er opplæring med 341 mill. kr og samferdsel med 210 mill. kr.
Lenkjer til:
Budsjettdokumenta
Samandrag av budsjettgrunnlaget (pdf-fil)
Kollektivtrafikk er eitt av satsingsområda i fylkesbudsjettet for 2008
Politisk handsaming
Fylkesbudsjettet og økonomiplanen går no til politisk handsaming. Fylkesutvalet skal gje si innstilling 20.-21. november og budsjettet vert vedteke av fylkestinget på møte 11.-12. desember.
Statsbudsjettet vert lagt fram fredag 5. oktober. Fylkesrådmannen vil på bakgrunn av nye opplysningar der og annan informasjon leggja fram eit tilleggsnotat om fylkesbudsjettet tidleg i november.
Hovudutfordringar
Den store utfordringa i budsjettet for 2008 og i økonomiplanperioden er finansiering av storsatsinga på kollektivtransport og investeringar.
Vidareføring av tiltaka som Bergen kommune har sett i verk i forsøksperioden, takstfrys og harmonisering av takstar for reiser til og frå Bergen, krev stor auke i budsjettet til samferdsel. Samla er det utrekna til ca. 230 mill. kr dersom alle tiltaka i Bergen skal vidareførast.
Brukar reservane
I 2008 er store delar av dei økonomiske reservane sette inn for å finansiera kollektivtrafikken. Mellom anna er det nytta 80 mill. kr i momskompensasjon for investeringar til å finansiera auken i driftsbudsjettet.
Fylkesrådmannen legg også til grunn eit særskilt statstilskot på 50 mill. kr i 2008. Etter fylkesrådmannen sitt syn er det ikkje rimeleg at tiltak som vert sette i verk i sluttfasen av ein forsøksperiode, skal få store følgjer for fylkeskommunen sin driftssituasjon. Fylkesrådmannen reknar med at sentrale styresmakter også ser positivt på den sterke kollektivsatsinga som finn stad i Hordaland frå 2008.
Bruken av investeringsmoms til drift vert avvikla fram til 2014. Nedtrappinga skjer med 20 mill. kr årleg frå 2010. Nedtrappinga vert ei stor økonomisk utfordring for fylkeskommunen.