Margareth Øvrum, konserndirektør for teknologi og ny energi i StatoilHydro (t.v), fylkesrådmann Paul. M Nilsen og dagleg leiar Trond Olsen i NCE Subsea gjorde stas på StatoilHydro sine medarbeidarar Allison Kennedy Thurmond og John Thurmond for deira deltaking i profilerings- og rekrutteringsfilmen ” WORK - LIVE - THRIVE - Why we moved to Bergen”.
Hordaland er eit attraktivt område både å jobba i og å etablere verksemder. På denne bakgrunn har Hordaland fylkeskommune i samarbeid med NCE Subsea, Bergen kommune, BS 2020, og Rekrutteringsprosjektet i Bergen Næringsråd produsert ein dvd om regionen sine styrker og attraktivitet.
Filmen ” WORK - LIVE - THRIVE - Why we moved to Bergen” er retta spesielt mot internasjonal arbeidskraft. Den er blitt ein suksess, og eit nyttig verkty i profilerings- og rekrutteringsarbeidet for verksemder i Bergen og Hordaland. Produsent er Alligator Reklamefilm AS
Hjernekraft og kompetanse
Margareth Øvrum, konserndirektør for teknologi og ny energi i StatoilHydro, ønskte velkomen i auditoriet i det gamle Hydro-bygget. Ho la i sin takketale til sine to amerikanske tilsette vekt på den sterkt auka kompleksiteten i arbeidsoppgåvene innan olje- og gassindustrien.
- Vi treng langt fleire hjerner per produsert oljefat i dag enn tidlegare. Difor er vi avhengige å trekkja til oss kompetent arbeidskraft, understreka Øvrum (bilete).
Dagleg leiar Trond Olsen i NCE Subsea innleia deretter om filmen og korleis den kom i stand. Ideen vart klekt ut og velsigna av hordalandsdelegasjonen under OTC i Houston i mai, der mellom anna fylkesordførar Torill Selsvold Nyborg og fylkesrådmann Paul M. Nilsen leia an. Olsen oppretta også her kontakt med John Thurmond.
- Filmen er delt inn i tre modular, der natur og kultur ligg fast, og i denne første utgåva er det fokus på undervassteknologi og subseaindustrien i Hordaland. Filmen er modulbasert slik at ein kan byte ut subsea med annan industri, og lagt til rette for stor gjenbruksverdi av denne filmen. Vi er takksame for innsatsen til Allison og John med filmen, både i arbeids- og fritida dykkar, sa prosjektleiar Olsen.
Med seg i prosjektgruppa hadde han Ola Ronæss, ein av landet sine fremste ekspertar innan kommunikasjon og merkevarebygging. Bergens Næringsråd og Bergensscenarier 2020 var representert gjennom Rekrutteringsprosjektet ved Berit Øxnevad Lie og Hans Martin Moxnes. Vidare var Liv Strømme frå NCE Subsea med, samt Vidar Totland for Bergen kommune og Simon Sortland frå Hordaland fylkeskommune.
Kort og godt
Målet var å få laga ein profilerinsgfilm til Deep Ocean Technology-messa (DOT) i Stavanger 11. oktober. Fylkestinget løyvde ein halv million kroner i juni. Bergen kommune er inne med 250 000 kroner og NCE Subsea med 50 000 kroner. Evenementet på DOT-messa var i tillegg sponsa av NCE Subsea, der filmen hadde premiere og fekk ei flott mottaking.
Filmen hadde snikpremiere på Offshore Europe i Aberdeen og på Mongstad under næringskonferansen til Nordhordaland Handverks- og Industrilag i byrjinga av september.
- Det viktige er å finne dei rette folka vil ein få jobben gjort, og det har de fått til med denne filmen under Olsen si prosjektleiing. De er ekte folk i ekte situasjonar, og difor er filmen heilt spesiell og får fram bodskapen på ein flott måte, takka fylkesrådmannen ”skodespelarane” John og Allison. Han overrekte to grafiske trykk av G. Nymark med vestlandsmotiv.
Prosjektleiar Hans Martin Moxnes i Bergen Næringsråd orienterte til slutt om prosjektet "Rekrutterings- og profileringsarbeid - samarbeid mellom industrien og det offentlege".
Fylkesrådmann Nilsen overrekte to grafiske trykk til ekteparet Thurmonds. Hans Martin Moxnes (t.v) i Bergen Næringsråd føl med.
– Eit av våre nye prosjekt heiter Kom og Bli. Det er ikkje nok å få folk til å kome hit, me må få dei til å bli verande også, understreka Moxnes.
Lokkar utanlandsk arbeidskraft til Hordaland
Filmen “WORK - LIVE - THRIVE - Why we moved to Bergen.”