Framsynte
– Med opninga av Austevollsbrua vert det fast samband mellom alle øyane med større busetnad
i Austevoll kommune. Øyriket Austevoll er knytt saman med bruer og vegar. Austevoll-samfunnet har nådd visjonen og målsetjinga som framsynte lokalpolitikarar trekte opp midt på 1970-talet, sa fylkesordførar Torill Selsvold Nyborg i helsinga si i brumagasinet som vart gjeve ut til opninga.
Det var folkefest då Austevollsbrua vart opna laurdag 17. november. (Foto: John Levi Weløy.)
Vidare helsa fylkesordføraren slik:
Starta i 1980
Det byrja med Selbjørnsbrua som knytte Selbjørn og Huftarøy saman då ho vart opna i 1980. Deretter gjekk det 18 år, så vart fylkesvegferja over Stolmasundet avløyst av verdas lengste fritt fram bru. Alt året etter – i 1999 – var det stor opningsfest for Bakkasundbruene mellom Storekalsøy og Hundvåkøy.
Unik situasjon
Det var ein unik situasjon då Hordaland fylkeskommune i siste halvdel av 1990-åra parallelt bygde ut dei store prosjekta Stolmasundbrua og Bakkasundbruene. Det var dei to største fylkesvegporsjekta som til då var realiserte. Fylkeskommunen tok dette krafttaket for å binda øykommunen saman i godt samarbeid og med vesentleg eigeninnsats frå Austevoll-samfunnet si side. Statlege midlar frå potten til store fylkesvegprosjekt hjelpte også på.
Stor eigeninnsats
Riksvegprosjektet Austevollsbrua er også ei utbygging som er gjort med stor eigeninnsats frå lokalsamfunnet. Med 77 mill. kr i tilskot frå kommunen og Austevoll kraftlag og 190 mill. kr i bompengar er den lokale finansieringa av prosjektet svært stor. Hordaland fylkeskommune har støtta fullt opp om utbygginga og har garantert for låneopptak på inntil 240 mill. kr.
Det er også gledeleg at regjeringa godkjente at sparde ferjetilskot på over 140 mill. kr kunne nyttast til å finansiera utbygginga.
Prislappen
Til dei som meiner at prislappen for å gjera øysamfunn «landfaste» er for høg, vil eg påpeika at ordinære riksvegmidlar berre utgjer 22 mill. kr av byggje- og finansieringskostnader på vel 430 mill. kr for Austevollsbrua.
Gode levevilkår
Å skapa gode levevilkår i heller grisgrendte strøk i landet vårt er viktig, ikkje minst i område der verdiskapinga er stor som nettopp i Austevoll. Dersom kommunikasjonane ikkje er tilfredsstillande, kjem ein i dag praktisk tala «ingen veg». Difor har det vore rett satsing å byggja desse store bruprosjekta.
Eg gratulerer og ynskjer lukke til!
Torill Selsvold Nyborg
Fylkesordførar
Lenkjer
Samferdselsministeren sin tale ved opninga
Oppslag på bt.no