Fylkestinget sin uttale etter framlegg frå Gisle Handeland (Ap):
U-864 – KRAV OM VURDERING AV ALTERNATIVE METODAR FOR HEVING
”Ubåtvraket med 65 tusen kilo kvikksølv på havbotnen utanfor Vestlandet er ei nasjonal og internasjonal miljøsak.
Fylkestinget krev at Regjeringa snarast set i gang ei ny utgreiing av hevingsalternativet med sikte på å finna ein miljømessig sikker hevingsmetode.
Fylkestinget kan ikkje sjå at utgreiingsarbeidet som ligg føre dokumenterer at alt som kan gjerast for å fjerna miljøtrusselen, er gjort. Fylkestinget konstaterer at dette og er den allmenne oppfatninga på heile Vestlandet.
Det er vanskeleg å akseptera at ein rik nasjon med undervassteknologi i verdsklasse ikkje er i stand til å få miljøgifta opp frå havet på ein forsvarleg måte.
Svaret på den sterke uroa og den massive motstanden mot å dekkja til vraket er å utgreia saka på nytt, og spesielt med sikte på alternative metodar for heving av miljøgifta.
Fylkestinget viser til ein rad resolusjonar frå landsmøte og fylkesårsmøte i ulike politiske parti i det siste. Alle stør krava om nye utgreiingar av hevingsalternativet.
Eit betre avgjerdsgrunnlag gir større tryggleik – og tiltaket som til slutt vert sett i verk større legitimitet !”