Det seier sekretær for styringsgruppa, Jone Engelsvold ved strategi- og næringsavdelinga i Hordaland fylkeskommune. VRI-programmet (Verkemiddel for regional FoU og innovasjon) skal fremje kunnskapsutvikling, innovasjon og verdiskaping gjennom regional samhandling mellom bedrifter og FoU-institusjonar.
Kraftig verkty
VRI programmet er omtalt i Stortingsmelding12 (2006/2007) ”Regionale fortrinn- Regional framtid” som del av regjeringa sin innsats for å styrka dei folkevalde regionane si rolle i samarbeidet mellom regionalt næringsliv og regionale utdannings- og forskingsinstitusjonar. Regionane skal få meir å seie knytt til FoU satsinga i sitt område, inkludert ansvaret for grunnløyvingane til dei regionale forskingsinstitutta.
- Det er nytt og positivt utfordrande at regionale styresmakter vert tiltenkt ei slik rolle i prioritering av nasjonale forskings- og utviklingsmidlar. For første gong går Forskingsrådet i så tett dialog med fylkes-kommunane og deira regionale partnarskap om å tildela forskingsmidlar for at felles handling skal skapa innovative regionar, seier Engesvold.
Regionalt næringsforum Hordaland (RNF), der fylkeskommunen er saman med sine viktigaste samarbeidspartnarar og verkemiddelaktørar, har hatt ansvaret for å senda den første søknaden frå Hordaland til NFR om deltaking i VRI.
Storsatsing
VRI er eit langsiktig program på heile 10 år, frå 2007 – 2017. Det betyr at ein kan revidera innsatsen og satsingsområda undervegs. Det samla budsjettet for alle fylka er 22 millionar for 2. halvår 2007. For 2008 og 2009 er det venta at budsjettet for VRI vil vere vesentleg høgare.
VRI programmet føreset 50 prosent regional medfinansiering. Det kan vere både fylkeskommunale midlar og eigeninnsats frå forskingsinstitusjonar og bedrifter. For 2007 søkjer Hordaland om 2,2 millionar kroner og seks millionar kroner i 2008. Søknaden vart sendt 15. mai og det er venta at sjølve arbeidet med VRI vil kunne kome i gang frå august 2007.
- I byrjinga vil me satsa særleg på reiseliv og marin sektor. Tiltaka vert ein regional dialogkonferanse med vekt på framtidsutsikter. Vidare ei kartlegging av FoU-ressursar og nye samhandlingsaktivitetar. VRI intergrerar også ein del FoU-prosessar retta mot næringsutvikling som allereie har pågått ei tid, til dømes Verdiskaping 2010. Dessutan tiltak som kompetansemekling og personmobilitet. På sikt vil merksemda også rettast sterkare mot internasjonalisering og kompetanseoppbygging, fortel Engesvold.
Europas mest innovative
Hordaland har sterke FoU- og næringsmiljø. Desse representerer eit stort potensial for auka etablering av nye, kunnskapsbaserte bedrifter både nasjonalt og internasjonalt. Samstundes må også eksisterande bedrifter ha fokus på produktutvikling, innovasjon og utvikling av konkurransedyktig miljøvennleg teknologi, og i aukande grad trekkje vekslar på FoU- og kompetansemiljøa i fylket.
Innovasjon føreset suksess i marknaden, ein marknad som i aukande grad er internasjonal. Skal visjonen realiserast og nyskaping bli verdiskaping, må det også leggjast til rette for at verksemdene kan lukkast internasjonalt.
Hovudgrepet er å få til økt regional samhandling mellom næringsliv, FoU institusjonar og offentlege styresmakter. Det vert også lagt vekt på å knyte tette band til nettverk- og systemverkemidlar som programma Arena, Norwegian Centres of Expertise (NCE) og Regions of Knowledge.
Hordaland skal vera mellom dei mest innovative regionane i Europa i næringar der fylkeskommunen har særlege føremoner, med vekt på lønsemd, internasjonal konkurransekraft og evne til omstilling. Dette gjeld særleg innan energi, reiseliv og marin og maritime næringar.
- Desse målsetnadene frå Regionalt Utviklingsprogram er samanfallande med ambisjonane i VRI-programmet. Ved slik å knyte ei nasjonal FoU satsing til regionale politiske og faglege prosessar kan ein få til ei samla prioritert satsing innan arbeidet med å gjere Hordaland til ein av dei mest innovative regionane i Europa.
Kommunal- og regionaldepartementet legg opp til at dei folkevalde regionane skal vere ansvarleg for denne utviklinga, og VRI programmet gjev regionane verkty for å nå desse måla. Dei skal stimulera til auka kompetanse, entreprenørskap, innovasjon og internasjonalisering, avrundar Jone Engesvold.
VRI-søknad frå Hordaland