Fylkestinget godkjende samrøystes «Den Nye Opera» (DNO) som ny regionopera for Vestlandet. Fylkestinget føreset at stiftinga i 2008 får ei permanent styreform med tilhøyrande vedtekter.
Fylkestinget føreset at «Den Nye Opera» får eit permanent namn som speglar den rolla stiftinga skal ha som regionopera for Vestlandet. Gjennom arbeidsplanen må stiftinga syna at stiftinga vil femna om oppgåver innan utvikling, profesjonalisering og internasjonalisering, og samstundes arbeida for ivaretaking og utvikling av det regionale operamiljøet som er skapt gjennom Vest Noregs Opera sitt arbeid.
Hordaland fylkeskommune skal samordna løyvinga til opera ved overføring av løyvingane til Opera Vest og Vest Noregs Opera til «Den Nye Opera» frå budsjettåret 2008. Fylkestinget utanom H og FrP vil, med føresetnad at Staten også aukar sine løyvingar, ta sikte på å gi ei auka samla løyving til opera og vil koma attende til dette i samband med budsjettet for 2008.
Den Nye Opera (DNO) er stifta av Bergen Filharmoniske Orkester, Den Nationale Scene, Festspillene i Bergen og Grieghallen AS. Utgangspunktet har vore Stortinget sitt vedtak om å vidareutvikla operatilbodet også utanfor hovudstaden i samband med det nye operahuset i Oslo. Gjennom etableringa av DNO vonar ein å skapa grunnlag for ei monaleg auke i det profesjonelle operatilbodet på Vestlandet.
Føremålet er mellom anna å etablera ei samla og effektiv organisatorisk eining for regionopera i Vest-Noreg som kan fungera som ei breitt akseptert, langsiktig og praktisk løysing for samhandling mellom aktørane innanfor operasektoren og kulturinstitusjonane i regionen, heiter det i saksutgreiinga.
DNO har formulert som eit av hovudmåla for verksemda i 2006 og 2007 å arbeida for å integrera dei to eksisterande operastiftingane Opera Vest (OV) og Vest Noregs Opera (VNO) i DNO. Opera Vest har vedteke full integrasjon med DNO, og etter forhandlingar er det tilrådd at VNO heilt og fullt skal integrerast i DNO tidleg i 2008.
Stanley Hauge 15.06.2007 14:04