Fylkesordførar Torill Selsvold Nyborg (KrF) markerte offisiell byggjestar av Nordahl Grieg videregående skole på Sørås fredag ettermiddag. (Foto: Simon Sortland).
Nordahl Grieg videregående skole er ein svært viktig del i den omfattande utbygginga fylkeskommunen er i ferd med å gjennomføra i skulesektoren, sa fylkesordførar Selsvold Nyborg ved opningsmarkeringa.
Det er eit mål for fylkeskommunen at det moderne skuleanlegget som me gjer store investeringar i, også skal verta ein samlingsstad for nærområdet skulen er ein del av. Me ynskjer at skulen både for elevar og andre grupper skal fungera som eit sosialt samlingspunkt og som eit informasjons– og aktivitetssenter, sa fylkesordføraren.
Stort løft
Som arbeidsstad for 900 elevar og eit par hundre lærarar og anna personale, vert Nordahl Grieg videregående skole ei stor bedrift og eit viktig bidrag til utviklinga i denne delen av Bergen kommune.
Fylkesvaraordførar Tom-Christer Nilsen (H) siterte diktet ”Til ungdomen” då fleirtalskoalisjonen i fylkesutvalet vedtok at den nye vidaregåande skulen på Sørås skulle bli oppkalt etter diktaren Nordahl Grieg. (Foto: Simon Sortland)
Fylkesordføraren trekte fram at fylkeskommunen no tek eit stort løft for fornying av dei vidaregåande skulane i Bergen: – Ved skulestart i fjor haust opna me den heilt nye Olsvikåsen videregående skole. No kjem Nordahl Grieg vgs og planlegginga av ein ny sentrumsskule på Nygårdstangen er godt i gang. Samla investeringar i desse tre skulane passerer 900 millionar kroner.
– Denne utbygginga vil gje oss nye, moderne og attraktive skular og mange tiltrengte elevplassar i den delen av fylket der veksten i ungdomskulla har vore sterkast.
Kort om Nordahl Grieg videregående skole, Bergen
Kostnadsramme: 380 mill. kr
Brutto areal: 14 161 m2
Kapasitet: 878 elevar
Byggjestart juni 2007
Ferdig skulestart 2009
Nordahl Grieg videregående skole får desse studieretningane: Allmenne, økonomiske og administrative fag, medium og kommunikasjon, sal og service, helse- og sosialfag, formgjevingsfag pluss to firargrupper.
Link arkitekter AS sitt utkast Cote vart kåra til vinnar i arkitektkonkurransen for den nye skulen.
Politisk og administrativ leiing i Hordaland fylkeskommune saman med samarbeidspartnarar markerte den offisielle byggjestarten på Sørås av Nordahl Grieg videregående skole. (Foto: Simon Sortland)
Kontrakten for grunnarbeidet er tildelt entreprenør Rivenes A/S.
Spenncon A/S har fått oppdraget med levering av betongelement.
Ei rekkje andre kontraktar vil verta tildelte i haust.
Framdriftsplan:
Starta grunnarbeidet juni 2007, byggjearbeidet startar opp i oktober 2007 og arbeida vil gå føre seg fram til våren 2009. Vidare nyttar ein tida fram til skulestart 2009 til å setja i drift tekniske anlegg, og til å få på plass utstyr, innreiing og møblering.
