Det fall i ditt lodd å byggja opp den nye kulturavdelinga i Hordaland fylkeskommune etter nyorganiseringa av fylkeskommunane i 1976. Det gjorde du med stor arbeidskapasitet og evne til samarbeid og samhandling med kommunar og kulturmiljøa i fylket, sa fylkesmann Alsaker ved tildelinga.
Aasmund Mjeldheim får tildelt Kongens fortenestemedalje i gull av fylkesmann Svein Alsaker.
Engasjement og idérikdom
På din lågmælte og rolege måte stod du for det daglege arbeidet i avdelinga. Samstundes hadde du engasjement og idérikdom til å medverka til nye tiltak. Kulturavdelinga i Hordaland fylkeskommune vart ein inspirator og modell for utbygging av kulturadministrasjonar i kommunane i fylket, sa fylkesmannen.
Nyskaping
Alsaker heldt fram: Du evna å få gode og kreative krefter til å dra i same lei. Dette førde til nyskaping.
Fylkesmannen trekte fram: Skrivekunstakademiet, Hordaland Teater, fylkesmusikar-gruppa, Ole Bull akademiet på Voss, Carte Blanche, Nordsjøfartmuseet, operaverksemda i Hordaland, 1000-årsmarkering for kristninga av Noreg.
Spennvidda viste du ved at samstundes som du fekk oppretta Ole Bull akademiet for folkemusikken, så engasjerte du deg for Vossajazz.
Aasmund Mjeldheim saman med fylkesmann Svein Alsaker og fylkesordførar Torill Selsvold Nyborg like etter han fekk tildelt Kongens fortenestemedalje i gull.
Departementet
Kulturdepartementet har ved fleire høve brukt kompetansen og erfaringa di i samband med stortingsmeldingar og andre viktige utgreiingar, sa fylkesmann Alsaker.
Bautastein
– Du er ein bautastein i kulturlivet i Hordaland. Vi har sett uendeleg stor pris på deg, sa fylkesordførar Torill Selsvold Nyborg i si gratulasjonshelsing. – Du er ikkje redd for å seia kva du meiner, gjerne på din litt underfundige måte.
Stor autoritet
Økonomidirektør og fung. fylkesrådmann Johnny Stiansen helsa og gratulerte frå fylkesadministrasjonen.
– I tillegg til det fylkesmannen trekte fram om deg, må også plasseringa av TV2 i Bergen, bokbåten og venskapssambandet mellom Hordaland og Orknøyane nemnast som viktige tiltak du har vore sentral i, sa Stiansen. – Få er merksam på det, og sjølv skryter du ikkje av det, men du var først med å lansera ideen om at TV2 måtte plasserast i Bergen.
Stiansen trekte fram at Mjeldheim hadde stor autoritet når avgjerder skulle takast i kultursaker. Du vart nytta og lytta til av departement og i andre sentrale organ.
Mild i form, sterk i sak
Museumsdirektør Atle Thowsen ved Bergen Sjøfartsmuseum omtala Mjeldheim slik: Du er mild i form – sterk i sak. Du er utolmodig i ditt tolmod. Du er også ein måtehaldsmann, men ein som også viser måtehald i måtehaldet.
Thowsen sa at då museumsordninga vart gjort til eit ansvar for fylkeskommunane, så brukte Mjeldheim høvet til å utvikla Hordaland til museumsfylke nummer ein i Noreg. Det skuldar hordalandsmusea han stor takk for.
Samla hordalandskulturen
Du er hordalandskulturens Harald Hårfagre, sa fylkesarkivar Egil Nysæter. Du fekk samla dei ulike delane av kulturlivet under ei eining.
Dine ord har vore jordnære og rett på sak, utan utanomsnakk. Som sjef gav du medarbeidarane dine handlingsrom, sa Nysæter.
Ei stor takk
– Takk. Ei stor takk. Medaljen er ei stor æra og eit kjært minne om ei rik tid med gjeremål og oppgåver i Hordaland fylkeskommune. Han er også eit uttrykk for ein heider som eg lett kan dela med mange, først og fremst medarbeidarane mine i Hordaland fylkeskommune, sa Aasmund Mjeldheim ved tildelinga. – Men det gjeld også Hordaland fylkeskommune som institusjon og det gjeld heile det mangslungne og mangbølte kulturlivet i Hordaland.
Kulturplan 1975 la grunnlaget
Kulturplanen frå 1975, «Kultur er allemannseige», var grunnlaget for det som vart arbeidet mitt i kulturavdelinga i fylkeskommunen. Ein god plan som framleis er verd å lesa i dag, sa Mjeldheim.
Fylkeskultursjef i Hordaland 1978-2003, Aasmund Mjeldheim, med Kongens fortenestemedalje.