Tekstil- og lærkonservator Friederike Vonderschmitt frå Bevaringstenestene ved Museumssenteret i Salhus legg siste hand på den første utstillinga i fylkeshuset.
- Me fokuserer mest på bevaringstenestene og våre hovudoppgåver som er førebyggande og direkte konservering, fortel tekstil- og lærkonservator Friederike Vonderschmitt. Utstillinga synleggjer prosessane ved tekstil konservering. Seinare kan det verte presentasjon av gjenstandskonservering.
Utstillingsvindauge
I fylkeshuset i Agnes Mowinckels gate 5 er det no kome på plass utstillingar i vindauga på gateplan. Den eine delen er fast reservert organisasjonen Hordaland fylkeskommune, medan den andre delen vil variere mellom ulike tiltak fylkeskommunale driv eller støttar. Utstillingsgruppa er leia av konsulent Kristin Myren ved informasjonstenesta. Ho har med seg Ann Steindal og Mariann Leganger.
- Det er mest vidaregåande skular og kulturinstitusjonar som til no har meldt si interesse, og utstillingsarenaen er fullbooka fram til februar 2010, opplyser Myren.
Bevaringstenestene opna 15. januar i år. Dei jobbar for ulike museum, mellom anna dei andre avdelingane som også er konsolidert under Museumssenteret i Salhus. Det er Norsk Trikotasjemuseum, Felleskonservator, Havråtunet, Kulturverntenesta i Nordhordland, Lyngheisenteret og Osterøy Museum. Desse kan vere aktuelle for å ha sine eigne utstillingar i fylkeshuset.
- Målet vårt med utstillinga er å synleggjera oss sjølve og kva konservering betyr, seier Vonderschmitt.