Førearbeidet som har ført fram til oppretting av ein «hordalandsklasse» i Erfurt, kom i gang då ein delegasjon frå fylkeskommunen vitja byen våren 2006. Byråden for skulesaker, Dr. Werner Ungewiß (nr. 3 frå venstre), tok imot delegasjon. Frå Hordaland deltok fylkesrådmann Paul M. Nilsen (nr. 2 frå høgre), nestleiar ved Opplæringsavdelinga Inger Øvsthus Tønder, gruppeleiar for internasjonalt arbeid Svein Schørder Amundsen (t.h.) og seniorrådgjevar Thore Thomassen (nr.2. frå venstre). (Foto: Tormod Valaker.)
Meir fart i arbeidet
Frå hausten vert det endå meir fart i arbeidet med internasjonaliseringa på Askøy videregående skole. Då startar skulen den første yrkesfaglege klassen utanlands i Hordaland fylkeskommune sin regi.
– Vi gler oss, ikkje minst over den store søknaden vi fekk, seier Liv Skipenes, som blir ansvarleg for opplegget på skulen.
Frå før har Øystese gymnas tilbod om internasjonal klasse på St. Paul’s Lutheran High School i Missouri, og Knarvik vidaregåande har over år hatt tilbod på vidaregåande kurs II i Cardiff og Vale of Glamorgan i Wales. Kvart år tilbyr fylket også to skuleplassar på Orknøyane. Nå står åtte elektroelevar på Vg2-nivå for tur.
29 søkjarar
I alt melde det seg 29 søkjarar frå heile fylket etter kort frist til dei åtte plassane som fylket har fått til rådvelde på Andreas Gordon Schule midt i Erfurt, ein skule som har dei beste skussmål med seg.
– Vi er veldig glade for at det vart nettopp Andreas Gordon. Skulen har eit sers godt omdøme og ligg langt fremme fagleg med eit variert og spanande tilbod på mange felt. Vi har vore på inspeksjon og drøfta fagplanar. Elektroavdelinga vår var imponert over det dei fekk sjå. Elevane får eit lærerikt og annleis skuleår i Erfurt, seier Liv Skipenes.
Thüringen
Erfurt er hovudstaden i delstaten Thüringen, midt inne i det gamle Aust-Tyskland, ikkje langt frå Weimar og endå nærare skiskyttarmetropolen Oberhof. Liv Grethe Skjelbreid og Ole Einar Bjørndalen er velkjende namn i byen der Martin Luther gjekk på skule og var prest.
Byen var sterkt nedsliten etter mange år med austtysk vanstyre. Etter meir enn femten år med omfattande restaurering står Erfurt i dag fram som eit attraktivt reisemål og eit godt utbygd skulevesen. Byen ligg vel to timar med tog rett aust for Frankfurt. Det er heller ikkje langt til Berlin.
Velkomen kontakt
– Vi ønskjer å knyte nærare kontaktar med Vest-Noreg, og skuleklassen frå Askøy er ein viktig lekk i det arbeidet. Vi vonar at vi skal få til å sende elevar andre vegen også, men så langt er vi ikkje komne enno. Uansett gler vi oss til å ta imot elevane frå Noreg, og vi skal syte for at dei får eit godt skuleår hos oss, seier byråden for skulesaker, Dr. Werner Ungewiß. I september kjem han saman med Oberbürgermeister Andreas Bausewein til Bergen for å møte elevar og foreldre på Askøy.
Tre utdanningsprogram
Elevane blir fordelte på tre utdanningsprogram. Tre av dei skal gå Automasjon, og tre skal på Elenergi. Dei to siste skal gå Data og elektronikk. Skuleåret startar på Askøy med eit intensivkurs i tysk språk og samfunnslære.
– Vi har drøfta opplegget med vertskapet og kome fram til at den beste modellen vert skulegang på Askøy fram til haustferien. Så fer elevane til Erfurt midt i oktober. Skuleåret for dei sluttar rundt 10. mai. Då kjem dei tilbake for å avslutte skulegangen på Askøy. Det er sers viktig for oss å streke under at året vert eit fullverdig skuleår og at elevane har det same skuletilbodet som elevane elles får og skal ha, seier Liv Skipenes.
Godt internat
Elevane skal også ha ein god plass å bu. Saman med skulemyndigheitene i Erfurt har Askøy funne fram til eit godt internat der elevane skal bu to og to i lag. Internatet er godt utstyrt, og Askøy-elevane får god forpleining. Byen sponsar dei med gratis buss- og trikkekort, og gir gratistilbod på mange fritidsaktivitetar.
Erfurt har eit godt utbygd nett med sportshallar og arenaer. Mest kjend er skøytehallen som er kalla opp etter byens store EM, VM- og OL –stjerne, Gunda Niemann-Stirnemann.
Mønster frå Knarvik
– Ikkje minst får elevane våre eit godt og lærerikt år, seier Liv Skipenes. Undervisninga skal gå føre seg på tysk.
– Det kan sjølvsagt by på problem i startfasen. Men erfurtarane er trivelege og hjelpsame folk. Eg trur dette skal gå veldig bra, seier Skipenes.
Ho vert ikkje åleine om å ta seg av elevane i Erfurt. Lærarar på Askøy får ansvaret for fellesfaga, og elektroavdelinga tar sin del.
– Etter mønster frå Knarvik skal vi skipe ei ordning med reiselærarar. I tillegg til dette blir skuleportalen It’s learning eit viktig hjelpemiddel, seier Skipenes. Det kjem ikkje til å skorte på innsats frå Askøy si side for å leggje forholda best mogeleg til rette.
Nyttige lenkjer:
www.ags-erfurt.de (om skulen)
www.erfurt.de (om byen)
