Prosjektet går ut på å utvikla eit revolusjonerande kartdataprogram for oppdrettsnæringa – AkvaVis. Dei tre vestlandsfylka Rogaland, Hordaland og Sogn og Fjordane står i fellesskap bak prosjektet.
Prototype
Målet med prototypen er at planleggjarar og andre på ein enkel måte skal kunne plassera «intelligente» symbol for oppdrettsanlegg på sjøkart og få «raudt eller grønt lys» ut frå brukskvaliteten på lokaliteten. Første versjon vil vera tilpassa blåskjeldyrking, men systemet skal kunna utviklast vidare til å omfatta fleire artar.
AkvaVis konseptmodell viser mogleg optimal plassering av eit oppdrettsanlegg i et kystområde.
Samarbeidsavtale
Hordaland fylkeskommune underteikna tidleg i juli ein samarbeidsavtale med Christian Michelsen Research (CMR) om utvikling av eit datasimuleringsverktøy for optimal plassering av ulike typar oppdrettsanlegg langs kysten. Prosjektet har namnet «AkvaVis – identifisering av områder egnet for akvakultur», og har tre hovudkomponentar:
Optimal lokalisering
1. Utvikla og systematisera kunnskapsgrunnlag om optimal lokalisering av ulike artar for oppdrett og havbruk. Her skal Havforskingsinstituttet samla informasjon om oppdrettsarten sine krav til omgjevnadane. Det kan vera ideell straumstyrke, djupn, temperatur, med meir.
Digitalt straumatlas
2. Framskaffa og ta i bruk eksisterande oceanografiske grunnlagsdata av høg kvalitet og med relevans for oppdrettsnæringa. Vidare skal det utarbeidast digitalt straumatlas som vil gje informasjon om næringstilgang for skjel.
Simuleringsprogram
3. Utvikling av ein datamodell og eit GIS-verktøy for havbruks- og kystsoneplanlegging tilpassa fylkeskommunane si rolle i overordna planlegging, politikkutforming og rådgjeving. Dette verktøyet skal dels vera kartlag i fylkeskommunen sine internettkart og dels eit nytt simuleringsprogram (AkvaVis) for å finna område som er eigna for oppdrett.
Bruksrett
Hordaland fylkeskommune får som initiativtakar og oppdragsgjevar vederlagsfri bruksrett til prototypen som vert utvikla under namnet AkvaVis. Bruksretten gjeld også målgruppa for prosjektet, dvs. Rogaland, Hordaland og Sogn og Fjordane fylkeskommunar, kommunane i dei tre nemnte fylka og dessutan næringsaktørar for nye artar knytte til dei same tre fylka.
CMR
Samarbeidet mellom Hordaland fylkeskommune og CMR byggjer på CMRs unike kompetanse på forskingsbasert programvare for analysar av mange ulike typar geografisk informasjon innan energi, marin og maritim sektor og fylkeskommunen si erfaring frå det tidligare Interreg-prosjektet SEAGIS og seinare program som Norcoast, KYSTRÅD og Havbruksanalyse.
Havforskningsinstituttet
Havforskningsinstituttet er også med i prosjektet og medverkar med sin kompetanse samt miljø- og straumdata frå resipientundersøkingar og MOLO-prosjektet.
Frå ide til prosjekt
AkvaVis har i løpet av svært kort tid utvikla seg frå ein fylkeskommunal ide til eit regionalt prosjekt som no omfattar CMR, Havforskningsinstituttet (IMR) og fylkeskommunane Hordaland, Rogaland og Sogn og Fjordane. AkvaVis har eit budsjett på 2 millionar kroner og prototypen er planlagt ferdig i byrjinga av 2008. CMR ønskjer samtidig å gjera marknadsanalysar for AkvaVis med tanke på kommersialisering av programvara.
GIS
GIS står for Geografiske Informasjonssystem og er ein samleomgrep på dataprogram for lagring, tilrettelegging, analyse, og presentasjon av samfunns- og miljøinformasjon som kan presenterast i kart.
Tekst: Thor Christoffersen, Rådgjevar «Arbeidslag for verdiskaping i kystsona», HFK