- Det var med stor glede me mottok meldinga frå Regjeringa om at oljeverndepotet på Fedje skal gjenopprettast, seier fylkesordførar Torill Selsvold Nyborg.
Ho er overtydd om at dette i framtida vil føra til at ein raskare vil kunne setje inn tiltak for å redusera skadeverknadene ved oljeutslepp frå havaristar. Det er behov for ei auka satsing og styrking av oljevernberedskapen. Hordaland fylkeskommune ventar at det absolutt maksimale vert gjort for å unngå ulykker i eit av verdas mest utsette og trafikkerte farvatn.
- Vi kan ikkje akseptera anna enn at vi skal vera best mogleg førebudde til å handtera konsekvensane når ulykker skjer. Avgjerda til Regjeringa om å gjenoppretta oljeverndepotet på Fedje er såleis svært gledeleg og særs viktig, skriv fylkesordføraren i eit brev til Fiskeri- og kystdepartementet.