Taxi 1 får nei til 30 nye drosjeløyve

Samferdselsutvalet i Hordaland har med 10 mot 3 røyster vedteke å seie nei til søknaden til Taxi 1 om å opprette 30 nye drosjeløyve i Bergensområdet. I søknaden skriv Taxi 1 at dei ønskjer å styrkje marknadsdelen sin.

Vedtaket er som tilrådinga frå fylkesrådmannen som vurderer at det ikkje er ein udekka etterspurnad etter drosjetenester i Bergensområdet. Det er dermed ikkje vilkår for å opprette nye drosjeløyve.

Mindretalet på tre røysta på eit forslag frå Elisabeth Tharaldsen Eide (Frp) om å innvilge 15 nye drosjeløyve til Taxi 1. Dette fekk dei tre røystene til Frp og fall.