Vedtaket om å seia ja til søknaden frå Kvam bompengeselskap A/S vart gjort med 35 røyster (H, Krf, Sp, V, Ap) mot 22 (Frp, SV, RV og uavh.) røyster.
RV røysta primært for eit eige forslag der dei seier at «Kvammapakken» er eit positivt og viktig prosjekt, særleg ut frå distrikts- og miljøsynsvinkel, men at finansieringa skal vera eit statleg ansvar. Forslaget fekk åtte røyster (SV, RV) og fall.
Fremskrittspartiet røysta primært for sitt eige forslag der dei stiller seg svært positive til prosjektet og utbetringane, men er prinsipielt imot at slike prosjekt skal finansierast gjennom bompengeinnkrevjing. Slike prosjekt er staten sitt ansvar og på finansieringssida. Også RV og T. Sveen (uavh.) støtta dette forslaget som fekk 16 røyster og fall.
Bjørn Lothe (SV) sette fram forslag om at søknaden skulle sendast på høyring til kommunane Odda, Ullensvang og Jondal kommune. Dette fekk åtte røyster (SV, RV) og fall.
Som ein del av det samla finansieringsopplegget for «Kvammapakken» går fylkestinget inn for å prioritere 25 mill.kr i statlege midlar frå sekkepostane innanfor den fylkesfordelte riksvegramma i siste del av perioden 2006-2009 og første del av perioden 2010-2015. Dette punktet i vedtaket var samrøystes.
Kvammapakken er på totalt 256 millionar kroner og skal brukast slik: 90 millionar til tunnel Nes-Øystese, 40 millionar til gang/sykkelveg Nes-Tolo, 30 millionar til trafikksikring Norheimsund-Linga, 80 millionar til vegutbetring Øystese-Granvin grense, 10 millionar til trafikksikring på Kvamskogen og seks millionar til kryss mellom riksveg 7 og riksveg 13 i Granvin.
1. januar 2008 er planlagt start for bompengeinnkrevjinga. Det skal byggjast to bompengestasjonar, ein øvst i Steinsdalen og ein på grensa til Granvin. Det er rekna med ei byggetid på seks år og ein bompengeperiode på 15 år.
Riksvegmidlane på 25 mill. kr frå sekkepostane i den fylkesfordelte riksvegramma vil samferdselsutvalet prioritere i perioden 2006-2009 og første del av perioden 2010-2015.
Endeleg vedtak kan skje i Stortinget våren 2007.