Gratis læremiddel
Innføring av gratis læremiddel til elevar som byrjar på andre året i vidaregåande skule, skal setjast i verk frå hausten 2007 legg regjeringa opp til. Fylkesrådmannen budsjetterer med 27,33 mill. kr til dette – same sum fylkeskommunen sitt rammetilskot frå staten er auka med til dette føremålet.
Endringar spesialundervisning
Frå 2007 vert ansvar for opplæring av pasientar i private helseinstitusjonar overført frå pasienten sin heimkommune og heimfylke til fylkeskommunen der institusjonen ligg. Også ansvaret for opplæring av born i barnevernsinstitusjonar vert flytta til fylkeskommunen der institusjonen ligg. I samsvar med ansvarsomlegginga er midlar trekte ut av kommunane sine rammetilskot og tilført fylkeskommunane. For Hordaland sin del utgjer dette 4,9 mill. kr. Fylkesrådmannen aukar budsjettet for ekstern spesialundervisning med same sum.
Regional utvikling
Det øyremerkte statstilskotet til regional utvikling og nyskaping vert på 61,35 mill. kr for Hordaland i 2007. Summen er 10,79 mill. kr høgare enn i fylkesrådmannen sitt budsjettgrunnlag frå 4. oktober 2006. Staten har for neste år lagt inn 8 mill. kr i skjønsmidlar til Hordaland m.a. med tanke på situasjonen i Ålvik.
Kollektivtransporten
Innan samferdsel aukar fylkesrådmannen løyvinga til tilskot til kollektivtrafikken med 3,1 mill. kr for å kompensera for høgare løns- og prisvekst enn det som var lagt til grunn i budsjettgrunnlaget pr. 4. oktober.
I samband med innføring av NOx-avgift får Hordaland fylkeskommune kompensert 4,4 mill. kr og fylkesrådmannen føreslår å auka løyvinga til transportsubsidiar med same sum.
Meir til kulturinstitusjonar
Fylkeskommunen sitt tilskot til Festspillene i Bergen, Hordaland Teater og Carte Blanche vert auka med i alt 457 000 kr for å følgja opp med tilsvarande auke som statsbudsjettet og i samsvar med avtalt fordelingsnøkkel mellom stat, fylke og Bergen kommune. Samla fylkeskommunalt tilskot vert på 9,66 mill. kr til dei tre institusjonane i 2007.
Andre endringar
Kontingenten til KS for 2007 vert på vel 5,4 mill. kr har KS sendt melding om, det er 46 000 kr høgare enn tidlegare lagt til grunn og budsjettet vert auka med denne summen.
Den direkte løyvinga til Vest-Norges Brusselkontor vert auka frå 300 000 kr i år til 500 000 kr i 2007. Etter avtalen skal Hordaland fylkeskommune yta 900 000 kr årleg og hittil har det vore fordelt med 1/3 som kontant overføring og 2/3 i form av tenester.
Fylkesutvalet sin tilleggsløyvingskonto vert auka med 646 000 kr til vel 3,6 mill. kr. Og driftsmidlar til investeringar vert auka med 2 mill. kr.
Løn og pensjon
Avsetjinga til auka pensjons- og lønskostnader kan reduserast med 10 mill. kr på bakgrunn av nye opplysningar om lågare auke i pensjonskostnadene.
Skatt og rammetilskot
Dei frie inntektene til fylkeskommunen, skatt og rammeoverføring frå staten, er auka med 33,1 mill. kr i høve til budsjettgrunnlaget frå 4. oktober. Skatteinntektene for 2007 er no budsjettert med 1 894 mill. kr og rammeoverføringa med 1 208 mill. kr.
I rammeoverføringa er det no innarbeidd 27,33 mill. kr til fire læremiddel til Vg2 frå hausten 2007, 4,4 mill. kr til dekking av utgifter med den nye NOx-avgifta og 4,9 mill. kr i samband med omlegging knytt til opplæring i helse- og barneverninstitusjonar.
Budsjetthandsaming
Fylkesbudsjettet for 2007 går nok til politisk handsaming i dei faste utval og fylkesutvalet før det kjem opp til vedtak i fylkestinget i Bergen 12.-13. desember.
Budsjettet skal handsamast i kultur- og ressursutvalet 7. november, i samferdselsutvalet 7.-8. november og i opplærings- og helseutvalet 14.-15. november. Fylkesutvalet handsamar budsjettet 22.-23. november og gjev då innstilling til fylkestinget.