Miljøverndepartementet har løyvt inntil 100.000 kroner til Hordaland fylkeskommune sitt arbeid for å auka tilgjenge for personar med nedsett funksjonsevne.
Pilotfylke
- Vi søkte om 1,5 millionar kroner og om å bli pilotfylke på dette feltet, seier plan- og miljøsjef Gudrun Mathisen i Hordaland fylkeskommune. Det er ingen pilotfylke enno, men Stord er til dømes pilotkommune på dette feltet. Miljøverndepartementet ynskjer at Hordaland fylkeskommune skal vere ressursfylke i planlegginga i andre fylke for utvikling av universell utforming.
Prosjektstilling
- Saman med Bergen kommune har vi oppretta ei prosjektstilling, og vi har fått bra med søkjarar før fristen gjekk ut i dag, seier plan- og miljøsjef Gudrun Mathisen i Hordaland fylkeskommune.
Løyvinga frå departementet er øyremerka driftsmidlar til prosjektstillinga. Med enkle grep kan til dømes IKT-løysingar, offentlege bygningar og transport gjerast lettare tilgjengeleg for folk med nedsett funksjonsevne.
Samarbeid
Midlane frå Statsbudsjettet for 2006 skal vidare brukast til å styrka samarbeidet for gjennomføring av planen. Fylkestinget i Hordaland vedtok 13. juni i år fylkesdelplanen ”Deltaking for alle – universell utforming.” Planen er resultatet av eit breitt samarbeid, m.a. med Bergen kommune, Fylkesmannen og Fylkesrådet for funksjonshemma.
Mathisen legg til at både planane og fylkeskommunen har fått mykje skryt for arbeidet.
Simon Sortland 10.11.2006 16:15