President i Slow Food, Carlo Petrini helsar på fylkesordførar Torill Selsvold Nyborg. Fram til 7. mai er han på første vitjing til Noreg for å setje seg inn i norsk matkultur og smake god, norsk mat og drikke. (foto: Bjarte Brask Eriksen)
Det sakte, gode livet
Slow Food er ei velkjend internasjonal rørsle som arbeider for å fremje matkultur og det sakte, gode livet, som ein slags motkultur til ”fast food”.
Fylkesordføraren tok imot Petrini då han gjesta Bergen. Under eit seminar på Universitetet utnemnde fylkesordføraren Hordaland til matkulturfylket i Noreg, og ho hadde mange gode grunnar til det.
Spanande og representativt
- Eg vil hevde at Hordaland er eit spanande og representativt fylke for den norske matkulturen som kan vise fram heile breidda i og utviklinga av norsk matkultur i ein kulturhistorisk riktig samanheng. Vi er eit variert landbruksfylke med mykje fjordlandskap og fjellnatur og med ein stor bredde i våre landbruksprodukt, men vi er og eit viktig fiskeri og sjømatfylke, og ikkje minst har Bergen hatt rolla som vårt viktigaste nasjonale og historiske eksportknutepunkt for matressursane våre til den internasjonale marknad. Oppdaginga av Bergensakevitten er eit godt døme på Bergen si rolle, sa fylkesordføraren.
Geitost, røykjesild og tørrfisk
Slow Food har utvikla eit eige system for å dokumentere og verne viktige matprodukt som ein del av vår felles verdsarv innanfor matkulturen.
Historisk viktige matkulturprodukt blir dokumentert og samla i Smaksarken og der utvalde matprodukt og produsentar av desse blir tekne vare på gjennom såkalla Presider. I dag er geitost frå Undredal, røykjesild frå Sunnmøre og tørrfisk frå Nord-Noreg fått verdsarvstatus.
Villsau som verdsarv
Fylkesordføraren er glad for at det er starta drøftingar om å få villsau med på lista over matkultur i verdsarvklasse. Planen er å knytte dette til Lygra, men fleire produsentar av villsau frå Vestlandet kan bli med som leverandørar
Fylkesordføraren vonar og at produkt innan marin sektor frå Hordaland kan få status som verdsarv, og det er planar om eit eige visingsanlegg for laks og aure i Hordaland.
Norsk Tradisjonsfisk
Fylkesordføraren kom og inn på den viktige rolla kultursektoren og prosjekt som Norsk Tradisjonsfisk har hatt for verdiskaping og utvikling av matkulturen vår. Fylkesordføraren har og tankar om utvikling av til dømes matkulturarkiv og tiltak for å ta vare på tradisjonskunnskap og formidling av den gode historie i nært samarbeid med kulturinstitusjonar og reiselivsnæringa i tida framover.
Sandsli videregående skole først i landet
Og ikkje minst nemnde fylkesordføraren det store engasjementet dei vidaregåande skulane har hatt for lokale matprodukt og tradisjonsmat.
- Det har lenge vore eit stort problem at opplæring i norsk tradisjonsmat ikkje har vore ein del av grunnopplæringa av norske kokkar i vidaregåande skular.
Sandsli vidaregåande skole var den første skulen i landet som av den grunn sjølv utvikla eit eige valfag for tradisjonsmat, som på kort tid vart svært populært.
Heldigvis blir no tradisjonsmat og opplæring i matkulturen i Noreg ein integrert del av opplæringa i dei nye nasjonale fagplanane for både første og andre året i vidaregåande skule.
Fredag 7. mai avsluttar Carlo Petrini det vekelange opphaldet i Noreg i Oslo og reiser attende til Italia.
Meir om noregsvitjinga til president Carlo Petrini