Fylkesordførar Torill Selsvold Nyborg døypte ”Frifant”, den nye arbeidsbåten til Bergen og Omland friluftsråd. (foto: Bjarte Brask Eriksen)
180 friluftsområde
– Vi har 180 eigedommar mellom Fensfjorden og Hardangerfjorden som vi skal tilretteleggje, vedlikehalde og å ta vare på. ”Frifant” er ein spesialdesigna arbeidsbåt som vi skal bruke til å løyse oppgåvene våre, fortel driftsleiar i Bergen og Omland friluftsråd, Åge Landro.
1230 hestekrefter
”Frifant” er 15 meter lang, har to motorar på i alt 1230 hestekrefter og ein driftsfart på 25 knop. På dekket er det god plass til gravemaskin, traktor og anna tungt utstyr. I baugen har båten nedfellbar køyrerampe, og stor heisekran gjer det enkelt å løfte utstyr på land. Båten er levert av Folla Maritime i Trøndelag.
Skorpo blir friluftsområde
Prisen på 6,5 millionar kroner er finansiert med to millionar frå staten, ein million frå Hordaland fylkeskommune, ein million ved sal av gamle ”Frifant” frå 1984, 350.000 kroner frå Interkommunalt utval mot akutt forureining, pluss vel to millionar kroner av eigne midlar.
14 kommunar i Hordaland samarbeider om det interkommunale friluftsrådet. Delar av Øya Skorpo er den siste av totalt 180 eigedommar som friluftsrådet eig. ”Frifants” første oppdrag er å tilretteleggje den flotte øya i Os.
Snart jubileum
I tillegg til eigne eigedommar, har friluftsrådet avtale om vedlikehald av statlege og kommunale friluftsområde. Neste år fyller Bergen og Omland friluftsråd 75 år.