I brevet påpeikar fylkesordføraren at energiverket på Mongstad er eit svært godt ENØK-tiltak, det vil ha svært høg enerigutnytting, er viktig for å modernisera raffineriet og for å sikra industriarbeidsplassar og anna sysselsetjing i Nordhordland og Bergensområdet.
Skisse av det planlagde energiverket på Mongstad. Illustrasjon: Statoil.
Viktig stor utbygging
Energiverket, slik det er planlagt, er det største industriprosjeket på land på mange år i Hordaland. Realiseringa av verket vil sikra 700-800 svært viktige arbeidsplassar i Nordhordland og indirekte fleire tusen andre arbeidsplassar i fylket som følgje av aktivitetane på Mongstad, seier fylkesordføraren i brevet.
For Norge som petroleumsnasjon er det også strategisk viktig å ha eit moderne og konkurransedyktig oljeraffineri, understrekar fylkesordføraren.
Godt miljøprosjekt
Fylkesordføaren påpeikar at det nye energiverket vil verta eit svært godt miljøprosjekt med ei energiutnytting på 70% — som truleg kan aukast til over 80% i framtida.
Likeleis er prosjektet eit framifrå ENØK-tiltak. Den framtidige kombinasjonen mellom den store elektrisitetsforbrukaren Troll Kollsnes og Troll A plattforma og den store varmeforbrukaren på Mongstad vil vera unik i Noreg.
… slikt gjev EU støtte til
«Eg vil også minna om at i Europa vert det gjeve omfattande økonomisk støtte til tiltak som det Statoil ønskjer å gjennomføra på Mongstad. Dette fordi EU ser den store fordelen det er å utnytta slike energimessig gunstige løysingar (CHP-direktivet),» heiter det i brevet til SFT.
Framtidig CO2-sentral
Fylkesordføraren oppfordrar styresmaktene til å gå saman med Statoil for å utvikla eit prosjekt for CO2-fangst og gjera Mongstad til ein framtidig CO2-sentral som utgangspunkt for transport av CO2 til aktuelle felt på sokkelen for å få auka oljeutvinninga der.
Kraftunderskot
Fylkesordførar Selsvold Nyborg minner styresmaktene om det store kraftunderskotet som vil råka Bergensregionen om få år. Det planlagde energiverket på Mongstad kan betra på denne situasjonen, og samstundes utsetja bygginga av den svært omstridde kraftleidningen frå Sima til Bergen med mange år.