Open veg og kai
Tilsegna frå fylkeskommune er gjeven på vilkår av at vegen og kaien skal vera open for forskjellige brukarar og aktivitetar og at Ullensvang herad medverkar finansielt i prosjektet. Like eins er det eit vilkår at Nordic Ice Water Company AS realiserer den planlagde etableringa og investeringa på Hovland.
Tilskotet vert dekka av større konsesjonskraftinntekter enn tidlegare budsjettert for 2006.
Vedtaket i fylkestinget var samrøystes. Men SV, V og RV røysta primært for eit fellesforslag frå Venstre og SV om å løyva 8 mill. kr slik Ullensvang herad hadde søkt om i tilskot frå fylkeskommunane.
Fylkeskommunen løyvde i januar i år 600 000 kr til forprosjektet om flaskevatnproduksjon på Hovland.
Vatn frå elva Vendo
Produksjonen er planlagd ved å ta vatn frå elva Vendo på Hovland, alternativt å etablera ei vassforsyning frå grunnvatnet i området. Rett til levering av vatn vert sikra gjennom avtalar med AS Tyssefaldene/Statkraft som er eigarar av vatnet som kjem frå Vendevatn på Hardangervidda. I tillegg vert det gjennomført prøveboring for alternativ grunnvassforsyning.
Vatnet vil verta førd i røyrgate ned til produksjonslokala og til reinsing og påfylling på flasker. Årsproduksjon er planlagt til om lag 200 millionar flasker.
Etableringa har eit samla kapitalbehov på 185 mill kr. Av dette utgjer driftsselskapet NIWC sine planlagde investeringar 100 mill kr, i tillegg til ein driftskapital på 30 mill kr. Det lokalt forankra eigedomsselskapet Hardanger Industripark AS (HIAS) kalkulerer med investeringar på 54,9 mill. Av dette arbeider Ullensvang herad med å få finansiert infrastruktur-delen av prosjektet, offentleg veg og kai, på til saman 16 mill kr. Heradet er og i dialog med HIAS om å løysa inn deler av sjølve eigedomen, som har ein samla verdi på 5 mill kr.
20-25 arbeidsplassar
Investeringa er venta å gje 20-25 industriarbeidsplassar.
NIWC er eit selskap som er stifta med føremål å etablera storskala industriell produksjon av flaskevatn i Noreg. Selskapet er eigd av tre ulike investorgrupper som saman har kompetanse på tre viktige område, logistikk/distribusjon, flaskevatnproduksjon og internasjonal merkevarebygging.