Eksportfylke
Hordaland og Sogn og Fjordane bidreg solid til verdiskaping og eksport i Noreg. Kvar femte eksportkrone skriv seg frå desse to fylka. Og Vestlendingen er både arbeidsam og skapande.
«Derfor har vi eit svært godt grunnlag for å realisere målet i den nye fylkesplanen om at Hordaland skal vere mellom dei mest innovative regionane i Europa!» sa fylkesordførar Selsvold Nyborg.
Nye verksemder skal skapa
Fylkesordføraren heldt fram: «Mange av dei nye verksemdene som skal skape framtida vår er ikkje eingong etablert enno. Derfor er det viktig å støtte nye initiativ, dristig nytenking og seriøse våghalsar i vårt arbeid med næringsutvikling. Det er blant desse vi skal finne morgondagens suksessar!
Av den grunn utfordrar eg oss alle til å våge meir, satse friskare, vere dristigare – og leite etter dei såkorna som skal skape morgondagens verdiskaping og arbeidsplassar i vår region.»
Nye oppdrettsartar
Fylkesordføraren trekte fram satsinga på nye artar innan oppdrett i Hordaland er eit godt døme.
I dag er ein fjerdedel av sysselsettinga innan oppdrett knytt til arbeidet med nettopp nye artar – trass i at produksjonen av nye artar utgjer mindre enn 1% av samla oppdrettsproduksjon.
Oppdrett av nye artar er framleis i ein startfase. Det krev mykje folk, det krev pengar og det krev kunnskap. Vågar vi ikkje satse dristig på dette feltet no, får vi heller ingen suksessar i framtida.
Tar temperaturen
Næringsbarometeret tar temperaturen på næringslivet i dag. Eg skulle gjerne sett at vi framover også fordjupar oss meir i å finne svar på kva krefter og føresetnader som er særleg viktige for at vår region også i framtida skal vere blant dei fremste næringsregionane i Europa, sa fylkesordførar Torill Selsvold Nyborg.
Dei gode hovuda
Mange hevdar at det er konkurransen om dei gode hjernane som er mest avgjerande. Først kjem dei gode hovuda – så kjem næringsutviklinga, hevdar m.a. Victor Norman. Altså: Dyktige folk skaper nye arbeidsplassar.
Eg trur det er mykje sant i dette. Dette utfordrar oss til å skape endå meir attraktive byar og lokalsamfunn - som verkeleg trekkjer til seg dei dyktige folka. Det betyr også satsing på god barnehagedekning, godt skuletilbod og eit mangfaldig kulturliv.
CO2-senter på Mongstad
Eg var inne på at vi må vi våge å satse på nye dristige idear og prosjekt. Tenk på kva eit framtidig CO2-senter på Mongstad kan bety for regionen vår!
Det vil kunne bli eit nytt industrieventyr, og gjere oss til eit kraftsenter for ny teknologiutvikling og innovasjon.
Eg er lei av å lese om gassrør og gass-satsingar i andre deler av landet. No vil eg at vi skal markere oss som gassregion nr. 1! Var sluttoppfordringa til fylkesordføraren ved presentasjonen av næringsbarometeret.
Omtale av næringsbarometeret nr. 1-2006.
Næringsbarometeret for Hordaland og Sogn og Fjordane 1-2006 (pdf)