Hordaland fylkesutval ber om at Fiskeri- og kystdepartementet umiddelbart vurderer situasjonen med sikte på å forsera arbeidet med å fjerna kvikksølvet i ubåtvraket (U-864) ved Fedje. Alt kvikksølvet må bort frå havbotnen – raskt, og for alltid!, heiter d
Fråsegna lyder:
«U-864 – fortgang i oppryddingsarbeidet!
Fylkesutvalet har merka seg at Kystverket no legg opp til å utgreia situasjonen og dei aktuelle tiltaka vidare i 2006, slik at det ikkje er aktuelt å iverksetja oppryddingstiltak før tidlegast i 2007.
Fylkesutvalet er svært uroa over at sjølve oppryddinga no ser ut til å dra ut i tid. Alvoret i situasjonen både når det gjeld den konkrete forureininga og forureiningsfaren frå kvikksølvlasta er så stort at fylkesutvalet er svært lite til freds med at dei konkrete oppryddingstiltaka ikkje vert sette i verk før tidlegast i 2007.
Det er umogleg utan vidare å akseptera at styresmaktene, med den høgt utvikla undervassteknologien og kunnskapen om operasjonar på havbotnen nasjonen i dag rår over, ikkje kjem i gang med oppryddingstiltaka før tidlegast i 2007.
Saka er viktig og alvorleg for lokalsamfunnet Fedje, men den er minst like viktig og alvorleg for fiskeri- og sjøfartsnasjonen Noreg og den tiltrua som eit reint norsk miljø og rein norsk sjømat er avhengig av i det internasjonale samfunnet.
Fylkesutvalet vil be om at Fiskeri- og kystdepartementet umiddelbart vurderer situasjonen med sikte på å forsera arbeidet med å fjerna kvikksølvet.
Alt kvikksølvet må bort frå havbotnen – raskt, og for alltid!»
Pressemelding om vedtak i fylkesutvalet