Ordførar Erling Walderhaug i Fedje kommune vert også med på møtet.
Også oljevernet vert teke opp
På møtet vil fylkesordføraren også ta opp spørsmålet om oljevernberedskapen og depotet på Fedje.
Fråsegn frå fylkesutvalet
Fylkesutvalet vedtok 26. januar fråsegn om U-864 der dei ber om at Fiskeri- og kystdepartementet straks vurderer situasjonen med sikte på å forsera arbeidet med å fjerna kvikksølvet i ubåtvraket. Alt kvikksølvet må bort frå havbotnen – raskt, og for alltid! Heiter det i fråsegna.
Heile fråsegna frå fylkesutvalet.
Fråsegn frå Vestlandsrådet
Vestlandsrådet vedtok tilsvarande fråsegn fredag 10. februar:
«U-864 ved Fedje – fortgang i oppryddingsarbeidet!
Det er konstatert at det lek kvikksølv frå vraket av ubåten U-864 utanfor Fedje. Saka er viktig og alvorleg for lokalsamfunnet Fedje, men den er minst like viktig og alvorleg for fiskeri- og sjøfartsnasjonen Noreg og den tiltrua som eit reint norsk miljø og rein norsk sjømat er avhengig av i det internasjonale samfunnet.
Vestlandsrådet har merka seg at Kystverket legg opp til å utgreia situasjonen og dei aktuelle tiltaka vidare i 2006, slik at det ikkje er aktuelt å setja i verk oppryddingstiltak før tidlegast i 2007.
Vestlandsrådet er svært uroa over at sjølve oppryddinga ser ut til å dra ut i tid. Både når det gjeld den konkrete forureininga og forureiningsfaren frå kvikksølvlasta, er situasjonen så alvorleg at Vestlandsrådet er svært lite til freds med at dei konkrete oppryddingstiltaka ikkje vert sette i verk før tidlegast i 2007.
Det er umogleg utan vidare å akseptera at styresmaktene, med den høgt utvikla undervassteknologien og kunnskapen om operasjonar på havbotnen nasjonen i dag rår over, ikkje kjem i gang med oppryddingstiltaka før tidlegast neste år.
Regjeringa må syta for at naudsynte midlar vert løyvde til operasjonen. Tek vi ikkje kostnaden no, gamblar vi med miljøet i det viktige spiskammeret som havet vårt er. Vi har ikkje lov eller råd til å venta – då kan prisen fort verta meir enn eit spørsmål om pengar.
Vestlandsrådet ber om at Fiskeri- og kystdepartementet straks vurderer situasjonen med sikte på å forsera arbeidet med å fjerna kvikksølvet.
Alt kvikksølvet må bort frå havbotnen – raskt, og for alltid!»