Målet med initiativet er å få det komande teknologisenteret for utvikling av CO2-handtering lagt til Mongstad, og få til ei industriutvikling i Nordhordland og vidare utover basert på og knytt til Mongstadutbygging 3, seier fylkesordførar Selsvold Nyborg.
Partnarskap
Måndag 18. desember var fylkesordføraren vert for det første møtet i partnarskapet. Her deltok fylkeskommunen, Lindås kommune, Austrheim kommune, Bergen kommune, Regionrådet for Nordhordland, Innovasjon Norge Hordaland og Hordaland olje og gass (HOG).
Fylkesordførar Torill Selsvold Nyborg var måndag 18. desember vert for det første møtet i partnarskapet for utviklinga av Mongstad, Mongstadutbygging 3. Frå venstre: Vidar Totland (Bergen kommune), strategi- og næringsdirektør Jan Per Styve (fylkeskommunen), fylkesordførar Torill Selsvold Nyborg, Jakob Bleie (styreformann i HOG), ordførar Håkon Matre (leiar Regionrådet i Nordhordland), ordførar Tove L. Brandvik (Lindås), dagleg leiar Eilif M. Berntsen (Regionrådet i Nordhordland), leiar Sjur Storaas (HOG), regiondirektør Nina Broch Mathisen (Innovasjon Norge Hordaland) og ordførar Ole Lysø (Austrheim). (Foto: Stanley Hauge.)
Studie
På møtet vart det vedteke å gjennomføra ein studie for å finna ut kva grunnlag for utvikling, nyskaping og vekst den komande Mongstadutbygginga kan opna for. Me ønskjer å få oversikt over utfordringar og oppgåver som kan vera aktuelle for kompetansemiljøa og verksemdene våre. Kva dei bør vera vakne for og gripa tak i, seier fylkesordførar Selsvold Nyborg.
Opprettar utval
Fylkesordføraren seier at studien skal vera klar i februar 2007.
– Når studien føreligg, vil me avgjera korleis me skal organisera partnarskapet og det vidare arbeidet. For å løfta fram prosjektet vil me trekkja kompetansemiljøa og arbeids- og næringsorganisasjonane med i partnarskapet, og det skal opprettast ei utval som får ansvaret for å følgja opp satsinga, seier fylkesordførar Torill Selsvold Nyborg.
Samling og samarbeid
Kompetansemiljøa i Hordaland må samla seg og samarbeida tett for at regionen skal få mest mogeleg ut av den nye utbygginga på Mongstad, seier fylkesordføraren og held fram: – Me har ei rekkje kompetansemiljø i regionen vår, og eg er overtydd om at desse miljøa kan bidra med nødvendig kunnskap inn mot Mongstadutbygginga. Deltaking i utbygginga vil utvikla desse miljøa ytterlegare og setja dei i stand til å vera i første rekkje i forhold til utvikling av ny teknologi og kompetanse. Særleg gjeld dette reinsing av CO2 , der Mongstad og vår region må ha ambisjon om å verta eit internasjonalt senter for CO2-reinsing.
Interessante oppgåver
Fylkesordføraren legg til at det også vil by seg interessante oppgåver i samband med sjølve raffineriutbygginga og til framtidig bruk av naturgass i Nordhordlandsregionen.