Fylkesvaraordførar Tom-Christer Nilsen, til venstre, stod for den offisielle opninga av toppidrett ved Voss Gymnas. Her gratulerar han rektor Erik Sølvberg, som vart overrekt fylket sitt fat som normalt vert delt ut til idrettsutøvarar med internasjonal suksess. (Foto: Sjur Herre, Hordaland)
Fylkesvaraordførar Tom-Christer Nilsen opna fredag føremiddag offisielt toppidrettslina ved Voss Gymnas, og rekte over fylkeskommunens fat, som vanlegvis går til idrettsutøvarar som oppnår internasjonal suksess.
– La dette fatet henga på skulen til inspirasjon for elevane, sa Nilsen då han leverte fatet til rektor Erik Sølvberg. Markeringa føregjekk på Idrottsplassen.
Idrettshistorie
Rektor Erik Sølvberg er tydeleg stolt over å kunne tilby toppidrett som fag på Voss Gymnas.
– Dette er ein veldig viktig dag for Voss. Dette er, saman med Åsane, det første offentlege toppidrettsgymnaset i landet, seier Sølvberg til «Hordaland».
Sølvberg fortalte publikum under markeringa at Voss Gymnas har ei lang og god idrettshistorie. I 1982 opna gymnaset med idrett som valfag, og mellom elevane som hadde dette faget, var Astrid Lødemel, Jan Einar Thorsen, Gudmund Skjeldal, Hilde Synnøve Lid og Anne Elisabeth Elvebakk. I 1990 starta skulen med idrettsline. Mellom elevane i første kull, var Kari Traa.
Mange av elevane ved toppidrettsgymnaset, har store ambisjonar. Bak frå venstre: Klaus Finne, Vinjar Slåtten, Hans Skulstad Dregelid, Stian Eriksen, Irene Lid, Hilde Fosse og Åsmund Hårklau. Framme frå venstre: Knut Lemme, Anders Øvsthus, Thomas Fenne, Guro Tveito, Torkel Gjeraldstveit og Anders Skjervheim. (Foto: Sjur Herre, Hordaland)
Skjeldal, Hole og Fenne
Voss Gymnas har fått tak i ressurspersonar på trenarsida i toppidrettsfaga for langrenn, skiskyting, alpint og freestyle.
Kristen Skjeldal leiar langrennstrening, Gisle Fenne er ansvarleg for skiskyting, medan Even Hole er tilsett som trenar i alpint, og han leiar også barmarkstreninga for freestylarane. Til vinteren, når treninga startar på snø, vil ein ny trenar koma inn på freestyle.
Fem elevar er komen inn på freestyle, fire går på alpint, to på langrenn og ein elev på skiskyting.
– Desse elevane vil trena med dei som går på idrettslina. Dermed vil også utøvarar som Sjur Røthe og Thomas Fenne dra nytte av toppidrettssatsinga på gymnaset, seier fagkoordinator Knut Steinar Skiple.
Første treningsøkt
Kristen Skjeldal har alt leia si første treningsøkt med elevane, og gler seg til det som kjem.
– Dette er spennande, og noko heilt nytt for meg, seier den dobbelte OL-vinnaren i stafett.
Even Hole gler seg til å vera med på å byggja på noko nytt for alpinsporten.
– Det er ei stor utfordring å vera med å byggja opp noko nytt. Me kan ikkje tenkja resultat dei første år, men heller satsa på å byggja opp ein kontinuitet. At dette er det første offentlege toppidrettsgymnaset, gjer at me står godt i konkurransen med dei private gymnasa, meiner Hole, som var landslagsalpinist i fleire år, og som har ein god CV som trenar, m.a. for Astrid Lødemel og Jan-Einar Thorsen.
Har ambisjonar
Vossajenta Irene Lid (16) går no på langrenn på toppidrettslina. Ho seier ho har store forventingar til skulen.
– Her trur eg alt ligg til rett for at ein kan bli god i idrett., seier Irene, som fortel at ho har ambisjonar om å utvikla seg maksimalt i langrennsporet.
– Det er veldig kjekt at me har Kristen Skjeldal som faglærar. Han har jo vore med på mykje som aktiv, og veit kva dette går ut på, seier Irene.
Fenne attende
Freestyle er nytt fag på skule, og to landslagsutøvarar er mellom elevane her: Vossingen Vinjar Slåtten og bergensaren Stian Eriksen.
– Det er veldig bra at me kan satsa på freestyle og utdanning her på Voss, fortel Vinjar Slåtten.
Stian Eriksen har tidlegare gått på NTG på Lillehammer, men valde å heller gå på Voss.
– NTG er nokså dyrt. Så det er betre å gå på eit offentleg toppidrettsgymnas, seier Eriksen.
Skiskyttar Thomas Fenne har gått eitt år på NTG på Geilo. Han har no flytta heim til Voss og går på Voss Gymnas si idrettsline.
– Eg ville heim til Voss, men utan den nye satsinga på gymnaset, hadde eg nok blitt på Geilo, seier Fenne.
«Utruleg raskt»
– Dette er ei solskinshistorie. Det er nesten utruleg at me har fått dette til på så kort tid. I fjor haust søkte me fylket om midlane, og at me alt no har fått opna toppidrettsgymnaset, er fantastisk. No er me avhengige av resultat, det vil seia at me må få ut potensialet til dei som går på lina, utan at me treng snakka om internasjonale medaljar, seier Roger Gjelsvik i Olympiatoppen til «Hordaland».
Fagkoordinator Knut Steinar Skiple (i midten) har fått med seg topptrenarar på Voss gymnas. Her er han saman med Kristen Skjeldal og Even Hole. Gisle Fenne var ikkje til stades under opninga. (Foto: Sjur Herre, Hordaland)